काठमाडौं । ग्लोबल आइएमई बैंकले चालु आर्थिक वर्षको तेस्रो त्रैमाससम्मको अपरिस्कृत वित्तीय विवरण सार्वजनिक गरेको छ । बैंकले सार्वजनिक गरेको वित्तीय विवरण अनुसार गतवर्षको तुलनामा बैंकको नाफा १६.९६ प्रतिशतले बढेको छ । बैंकले चैत्र मसान्तसम्ममा ४ अर्ब ३५ करोड रुपैयाँ खुद नाफा कमाएको छ ।

त्यस्तै, चैत्र मसान्तसम्ममा बैंकको खुद ब्याज आम्दानी ५८.५० प्रतिशतले बढेर ११ अर्ब ७९ करोड रुपैयाँ माथि पुगेको छ भने सञ्चालन नाफा १७.२० प्रशितले बढेको छ ।

समीक्षा अवधिमा बैंकको वितरणयोग्य नाफा ९६ करोड २६ लाख रुपैयाँ रहेको छ । यो अवधिमा ग्लोबल आइएमई बैंकको खराब कर्जा र कस्ट अफ फन्ड पनि बढेको छ ।

त्यस्तै, बैंक अफ काठमाण्डूसँग मर्जरपछि ग्लोबल आइएमई बैंकको चुक्ता पुँजी ३५ अर्ब नाघेको छ । चालु आर्थिक वर्षको तेस्रो त्रैमाससम्ममा बैंकको प्रतिसेयर आम्दानी १७ रुपैयाँ ०८ पैसा कायम भएको छ । हाल बैंकको प्रतिसेयर नेटवर्थ १५५ रुपैयाँ ९९ पैसा छ ।