काठमाडौँ । नेपोभिट टाईल्स्को पहिलो वार्षिक उत्सव समारोह सम्पन्न भएको छ । उद्योग वाणिज्य तथा आपूर्ति मन्त्रि रमेश रिजालको प्रमुख आतिथ्यमा सम्पन्न भएको यस कार्यक्रममा पूर्व महान्यायाधिवक्ता रमण प्रसाद श्रेष्ठ, महानायक राजेश हमाल र विभिन्न संघ संस्थाका अधिकारीहरुको उपस्थितिमा सो समारोह सम्पन्न गरिएको हो ।
कम्पनीको निर्देशक विभा झाले स्वागत मन्तव्य राख्दै सम्पूर्ण उपस्थित अतिथि तथा प्रतिष्ठित व्यक्तित्वहरुलाई स्वागत गर्दै नेपोभिट टाईल्सको एक वर्षको यात्रामा साथ दिने कर्मचारी, ग्राहकवर्ग, शुभचिन्तक तथा सम्पूर्ण साझेदारहरुलाई धन्यवाद दिए ।
द सोल्टी काठमाडौँमा आयोजित सो समारोहमा विभिन्न सांस्कृतिक कार्यक्रमको साथ मिडिया र सात सय भन्दा बढीको उपस्थितिमा नेपोभिट टाईल्सले नयाँ २.४ फिटका टाईल्सहरु पनि सार्वजनिक गरेको छ ।
वार्षिकोत्सव समारोहलाई सम्बोधन गर्दै नेपोभिट टाईल्सका प्रबन्ध निर्देशक मनोज रौनियारले नेपोभिट टाईल्सलाई साथ सहयोग पु¥याउने सबैलाई धन्यवाद ज्ञापन गरेका छन् । साथै उनले नेपोभिट टाईल्सको एक वर्षको चुनौती तथा सम्भावना हरुको बारेमा जानकारी गराउंदै नेपोभिट टाईल्स अझै बृहत र विस्तृत ढंगमा प्रस्तुत हुँदै चाँडै नै नयाँ डिजाइनका फ्लोर तथा वाल टाईल्स्हरु बजार भित्राउने जानकारी गरए ।
समारोहमा बोल्दै उद्योग वाणिज्य तथा आपूर्ति मन्त्री रमेश रिजालले नेपालमै पहिलो र एकमात्र टाईल्स कम्पनी नेपोभिट टाईल्सले गरेको काम सराहनीय भएको बताए । नेपोभिटले स्थानीयलाई तथा समग्र देशलाई नै गरेको योगदानको उच्च प्रशंसा गर्दै सरकारको तर्फबाट हरेक चरणमा नेपोभिटलाई साथ तथा सहयोग मिल्ने कुराको प्रतिवद्धता व्यक्त गरे ।
त्यसैगरी नेपोभिट टाईल्स्का अध्यक्ष शम्भु नाथ झाले नेपोभिट टाईल्सले एक वर्षमा हासिल गरेको उपलब्धीहरुका बारेमा बोल्दै अब आगामी वर्षहरुमा निर्यातमा जोड दिने मुख्य उद्देश्य रहेको कुरा जानकारी गराए ।
नेपालमा सेरामिक क्षेत्रको प्रचुर सम्भावनाहरुलाई उपयोग गर्दै टाईल्स मात्र नभई विभिन्न सेरामिक वस्तुहरु उत्पादन गरी देशमा अझै रोजगारीको सिर्जना गर्न र विदेशी मुद्रा भित्राउन नेपोभिट टाईल्स प्रतिवद्ध रहेको जानकारी गराए ।
