काठमाडौं । सामसङ ब्रान्डले नेपालमै टेलिभिजन उत्पादन सुरू गरेको छ । हिम इलेक्ट्रोनिक्ससँगको सहकार्यमा सामसङले नवलपरासीमा ल्याण्डमार्क टेलिभिजन कारखाना नै स्थापना गरेर उत्पादन सुरु गरेको हो ।
सामसङले बुधबार टेलिभिजन कारखानाको उद्घाटन समेत गरेको छ । कारखानाको उद्घाटन उद्योग, वाणिज्य तथा आपूर्ति मन्त्री रमेश रिजाल र सामसङ दक्षिण–पश्चिम एशियाका अध्यक्ष एवंम् प्रमुख कार्यकारी अधिकृत जे बि पार्कले संयुक्त रुपमा गरेका हुन् ।
स्थानीय अर्थतन्त्रमा ठूलो प्रभाव पार्ने गरी नेपालमा बहुराष्ट्रिय कम्पनीले इलेक्ट्रोनिक्स उत्पादन गर्न स्थापना भएको यो नै पहिलो उद्योग भएको कम्पनीले जनाएको छ ।
उद्घाटन समारोहमा आफ्नो मन्तव्य राख्दै सामसङ दक्षिण–पश्चिम एशियाका अध्यक्ष पार्कले नेपालमा दुई दशकभन्दा बढी समयदेखि रहिरहेको सामसङले नेपाली जनतासँग बलियो सम्बन्ध गाँसिसकेको बताए । उनले नेपाल सरकार र स्थानीय निकायहरुले लिएको बलियो लक्ष्य र आफूहरुलाई प्राप्त निरन्तर सहयोगका लागि धन्यवाद ज्ञापन समेत गरेका छन् ।
समारोहलाई सम्बोधन गर्दै गोल्छा समुहका अध्यक्ष शेखर गोल्छाले सामसङसंगको सहकार्यले नेपालमा यस क्षेत्रमा व्याप्त सम्भावनालाई दर्शाएको बताए । विश्वकै सबैभन्दा बृहत् इलेक्ट्रोनिक्स कम्पनीले नेपाली बजार प्रति गहिरो अभिरुची देखाएकोमा आम नेपालीहरुका लागि महत्वपूर्ण संकेत भएको उनको ठहर छ ।
उक्त उद्घाटन समारोहमा नेपालका लागि गणतन्त्र कोरियाका राजदूत पार्क चोङ सुक, सामसङ इलेक्ट्रोनिक्सका नेपाल प्रमुख सुङ जुन पार्क, लगायत अन्य स्थानीय अधिकारीहरुको उपस्थिति रहेको थियो ।
यो टेलिभिजन कारखानाको शिलान्यास अगष्ट, २०२२ मा गरिएको थियो । सामसङले हिम इलेक्ट्रोनिक्समार्फत् नेपालमा टेलिभिजन, रेफ्रिजेरेटर, वासिङ मेसिन, ओभन र स्मार्टफोनहरू बिक्री वितरण गर्दै आइरहेको छ।
