काठमाडौँ । उपप्रधानमन्त्री एवं गृहमन्त्री नारायणकाजी श्रेष्ठले राजनीतिक पहुँचको आधारमा कुनै पनि मिटरब्याजीले उन्मुक्ति नपाउने जिकिर गरेका छन् ।

आइतबार जनकपुरधामस्थित हुलाक कार्यालयको भवनमा अनुचित लेनदेन (मिटरब्याज) सम्बन्धि जाँचबुझ आयोगको केन्द्रीय कार्यालयको उद्घाटन गर्दै उनले राजनीतिक पहुँचको आधारमा कुनै पनि मिटरब्याजीले उन्मुक्ति नपाउने बताएका हुन् ।

उनले मिटरब्याजीको पक्षमा रहेका जोसुकैलाई पनि सरकारले कारबाही गर्ने चेतावनी पनि दिए । उनले भने ‘ अब सरकार पछि हट्दैन, मिटर ब्याजको आतंकलाई समाजबाट निर्मुल पार्न आवश्यक भइसकेको छ । यदि राजनीतिक छत्रछायाँमा मिटर ब्याज मौलाएको हो भने त्यसलाई पनि सरकारले अब कुनै पनि हालतमा छुट दिने छैन् । ’

देशका बिभिन्न भागमा मिटरब्याजीबाट पीडित सर्वसाधारण विगत तीन सातादेखि राजधानी केन्द्रित आन्दोलन गर्दै काठमाडौंमा जम्मा भएका छन् ।