काठमाडौं । अष्ट्रेलिया पठाईदिन्छु भन्दै रकम ठगी गर्ने व्यक्ति पक्राउ परेका छन् । चितवन जिल्ला भरतपुर महानगरपालिका वडा नं. ०४ स्थाई घर भई हाल काठमाडौं महानगरपालिका वडा नं. ०१ लाजिम्पाट बस्ने २७ वर्षीय संजय रेग्मी पक्राउ परेका हुन् ।
उनले वैदेशिक रोजगारीको लागि अष्ट्रेलिया पठाईदिन्छु, अष्ट्रेलिया जानको लागि ३० लाख रुपैयाँ लाग्ने र अष्ट्रेलिया पुगेपछि प्रतिष्ठित कम्पनीमा काम लगाइदिन्छु, मासिक ३ लाख भन्दा बढी तलब हुन्छ भनी विश्वास दिलाई प्रलोभनमा पारी पिडितहरुबाट पटक पटक गरी ३० लाख रकम लिई सम्पर्क विहिन भई ठगी गरेको प्रहरीले जनाएको छ ।
काठमाडौं उपत्यका अपराध अनुसन्धान कार्यलयबाट खटिएको प्रहरी टोलिले रेग्मीलाई बैशाख १७ गते दरवारमार्गबाट पक्राउ गरेको हो । पक्राउ परेका रेग्मीलाई थप अनुसन्धान तथा कारवाहीका लागि वैदेशिक रोजगार विभाग पठाईएको प्रहरीले जनाएको छ ।
