काठमाडौं । नागरिक लगानी कोषको खुद नाफा २६.१५ प्रतिशतले बढेको छ । संस्थाले सार्वजनिक गरेको चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण अनुसार गत आर्थिक वर्षको चैत मसान्तसम्मको तुलनामा खुद नाफा २६.१५ प्रतिशतले बढेको हो ।

वित्तीय विवरण अनुसार कोषले चैत मसान्तसम्म ७७ करोड ७९ लाख रुपैयाँ खुद नाफा आर्जन गरेको छ । गत आर्थिक वर्षको सोही अवधिसम्ममा कम्पनीले ६१ करोड ६६ लाख रुपैयाँ खुद नाफा कमाएको थियो ।

सार्वजनिक वित्तीय विवरण अनुसार समिक्षा अवधिमा कोषको ब्याज आम्दानी बढेसँगै कम्पनीको खुद नाफा बढेकोे हो । चैत मसान्तसम्म कम्पनीले ३० करोड ५० लाख रुपैयाँ ब्याज आम्दानी गरेको छ । उक्त ब्याज आम्दानी गत आवको सोही अवधिको तुलनामा १९६.७७ प्रतिशत बढि हो ।

चालु आवको तेस्रो त्रैमाससम्म कम्पनीको कुल आम्दानी पनि बढेर १ अर्ब २५ करोड ६९ लाख रुपैयाँ पुगेको छ । गत आवको सोही अवधिमा कम्पनीको कुल आम्दानी १ अर्ब ३ करोड ७ लाख रुपैयाँ थियो ।