काठमाडौं । नेपाल नागरिक उड्डयन प्राधिकरणले सिम्रिक एयरको सम्पूर्ण हेलिकप्टर उडानमा रोक लगाएको छ । आइतबार एक सूचना जारी गर्दै प्राधिकरणले सिम्रिकका सम्पूर्ण उडानमा रोक लगाएको हो ।
शुक्रबार संखुवासभामा भएको हेलिकप्टर दुर्घटनापछि प्राकिरणले सिम्रिक एयरसँग रहेका अन्य हेलिकप्टर उडानमा रोक लगाएको हो । अब अर्को सूचना जारी नभएसम्मका लागि सिम्रिकका सम्पूर्ण उडानमा प्रतिबन्ध लगाइएको प्राधिकरणले जनाएको छ ।
प्राधिकरणका अनुसार हाल सिम्रिक एयरसँग भएका अन्य हेलिकप्टरको परीक्षण तथा कम्पनीको विषयमा अडिट नहुँदासम्मका लागि उडान रद्ध गरिएको हो । शुक्रबार भएको दुर्घटनामा क्याप्टेन सुरेन्द्र पौडेल, सहयोगी मनोज थापा, छिरिङ भोटे र विद्युत प्राधिकरणका कर्मचारी विक्रम गुरुङ घाइते भएका थिए भने स्थानीय भविन गुरुङको निधन भएको थियो ।
