काठमाडौं । हिमालयन लाइफ इन्स्योरेन्सले एकीकृत कारोबार सुरु गरेको छ । मर्जर प्रक्रियामा रहेका जीवन बीमा कम्पनीहरु यूनियन, गुँरास र प्राइम लाइफ इन्स्योरेन्सले मंगलबारदेखि हिमालयन लाइफ इन्स्योरेन्सको नामबाट एकीकृत कारोबार सुरु गरेका हुन् ।

यी तिनै कम्पनीहरु १ः१ः१ सेयर स्वाप रेसियोमा मर्जरमा गएका हुन् । मर्जरसँगै बनेको हिमालयन लाइफ इन्स्योरेन्स कम्पनीको अध्यक्षमा सुलभ अग्रवाल र प्रमुख कार्यकारी अधिकृत (सीईओ)मा मनोजलाल कर्ण चयन भएका छन् ।

मर्जरसँगै हिमालयन लाइफ इन्स्योरेन्स जीवन बीमा कम्पनीतर्फ पूँजीका अधारमा दोस्रो ठूलो कम्पनी बनेको छ । मर्जरमा गएको प्राइम लाइफ इन्स्योरेन्सको दुई अर्ब ७७ करोड, गुँरास लाइफ इन्स्योरेन्सको दुई अर्ब ८ करोड र युनियन लाइफ इन्स्योरेन्सको दुई अर्ब १५ करोड गरी मर्जरपछि बनेको हिमालयन लाइफको चुक्ता पूँजी ७ अर्ब ७२ करोड रुपैयाँ नाघेको छ ।