काठमाडौं । रोमानिया पठाईदिन्छु भन्दै रकम ठगी गर्ने व्यक्ति पक्राउ परेका छन् । बागलुङ जिल्ला बागलुङ नगरपालिका वडा नं. ७ घर भई हाल काठमाडौं जिल्ला टोखा नगरपालिका वडा नं. ९ जाल्पाचोक बस्ने ४३ वर्षीय विशाल विश्वकर्मा पक्राउ परेका हुन् ।

उनले डिल बहादुर वि.क सहित ८ जनालाई वैदशिक रोजगारीका लागि रोमानिया पठाईदिने भन्दै रकम ठगि गरेका थिए । रोमानिया जान प्रतिव्यक्ति ५ लाख ५० हजार लाग्ने र रोमानिया पुगेपछि प्रतिष्ठित कम्पनीहरुमा काम लगाईदिने, मासिक १ लाख बढी तलब हुन्छ भनि विश्वास दिलाई प्रलोभनमा पारी पिडितहरुबाट पटकपटक गरी १८ लाख रुपैयाँ रकम लिई सम्पर्क विहिन भएको प्रहरीले जनाएको छ ।

उनलाई काठमाडौं उपत्यका अपराध अनुसन्धान कार्यालयबाट खटिएको प्रहरी टोलिले काठमाडौं महानगरपालिका वडा नं.२ लाजिम्पाटबाट पक्राउ गरेको हो । पक्राउ परेका विश्वकर्मालाई थप अनुसन्धान तथा कारवाहीका लागि वैदेशिक रोजगार विभाग बुद्धनगर, काठमाडौं पठाईएको प्रहरीले जनाएको छ ।