काठमाडौं । भारतले चलनचल्तीको दुई हजारको नोटमा प्रतिबन्ध लगाएको छ । भारतीय रिजर्भ बैंक (आरबिआई)ले दुई हजारको दरको नोटमा प्रतिबन्ध लगाउँदै नागरिकसँग भएको २ हजारको नोट बैंकहरुमा जम्मा गर्न आग्रहसमेत गरेको छ ।
दुई हजारको नोटबन्दी हुने खबरसँगै यतिबेला भारतमा सुन किन्नेहरु ह्वात्तै बढेका छन् । आरबिआईले दुई हजारको नोटमा प्रतिबन्ध लगाउने खबरसँगै भारतका विभिन्न सहरहरुका सुन पसलमा सुन किन्नेहरुको घुँइचो लागेको भारतीय सञ्चारमाध्यमले जनाएका छन् ।
दुई हजारको नोट बन्दी हुने खबरले सुन किन्नेहरु बढेपछि दुई हजारको नोटले सुन किन्नेहरुका लागि सुन व्यवसायीहरुले मूल्य बढाएको भारतीय सञ्चार माध्यमहरुले उल्लेख गरेका छन् । अहिले प्रति १० ग्राम सुनको मूल्य ७० हजार भारतीय रुपैयाँसम्म पर्ने गरेको ग्राहकहरुको गुनासो रहेको छ । जबकि शनिवार प्रति तोला सुनको मूल्य ६० हजार २७५ रुपैयाँ कायम भएको छ । त्यस्तै, चाँदीको मूल्य पनि बढाइएको छ ।
आरबिआइले दुई हजारको नोट सर्कुलर मार्फत फिर्ता लिनेछ । आरबिआईले आउँदो सेप्टेम्बर ३० सम्म दुई हजारको नोट बैंकमा जम्मा गर्न वा त्यसलाई बैंकमार्फत नै परिवर्तन गर्न आग्रह गरेको छ । आरबिआइका अनुसार त्यसपछि पनि उक्त नोट वैध नै मानिनेछ ।
