काठमाडौं । नेकपा एमालेका अध्यक्ष केपी शर्मा ओलीले तीन प्रमुख दलको भेटघाटलाई शंकाको घेरामा राख्नु गलत भएको बताएका छन् । प्रतिनिधिसभाको बैठकमा बोल्दै अध्यक्ष ओलीले नेताहरुको भेटघाटलाई शंकाको घेराभित्र राखिनु गलत भएको बताएका हुन् ।
नक्कली भुटानी शरणार्थी प्रकरणमा शिर्ष दलका नेताहरु पक्राउ पर्न थालेपछि कांग्रेस, एमाले र माओवादीका शीर्ष नेताहरुको भेट बाक्लिएको थियो । त्यसबेला संसददेखि सडकसम्मै तीन दलको भेटघाटप्रति धेरैले आपत्ति जनाएका थिए । यतिसम्म कि विभिन्न राजनीतिक दलका नेताहरुले तीन दलको मात्रै छुट्टै बैठक नबस्नसमेत आग्रह गरेका थिए ।
तर, उक्त समयमा भएको भेटघाट केवल देशको समृद्धिका लागि मात्रै भएको ओलीले दाबी गरेका छन् । ‘प्रमुख तीन दलको बैठक बस्दा शंका पैदा भयो, संसद बैठक पटक-पटक बस्दा शंका पैदा भयो, मन्त्रिपरिषद्को बैठक बस्दा शंका पैदा भयो । के भनेको त्यो ?’, संसदमा प्रश्न गर्दै ओलीले भने, ‘तीन दलको बैठकमा दुई दल दुधको कुण्डमा नुहाएको अनि म चाहिँ मेरो मान्छे बचाईदेउ भन्दै म्याउम्याउ गरेको ? बाघ भोकै मर्ला तर घाँस खाँदैन, म्याउँम्याउँ गर्दैन ।’
त्यस्तै, ओलीले नक्कली भुटानी शरणार्थी प्रकरणमा सरकारले दोषीलाई उम्काएर निर्दोषलाई फसाउने प्रयास गरेको समेत आरोप लगाएका छन् । उक्त प्रकरण सजिलै सामसुम पार्न नसकिने बताउँदै ओलीले निष्पक्ष छानबिनको समेत माग गरेका छन् ।
