काठमाडौं । पशुपति क्षेत्र विकास कोषको सदस्य सचिव मिलन थापाले सुनको जलहरीमा आफुले घोटाला गरेको भए मृत्युदण्डको सजाय भोग्न तयार भएको बताएका छन् । मंगलबार बसेको राष्ट्रिय सभा अन्तर्गतको राष्ट्रिय सरोकार तथा समन्वय समितिको बैठकमा उनले पशुपतिको जलहरी प्रकरणमा आफ्नो संलग्नता नभएको दाबी गरेका छन् ।
पशुपतिनाथमा चढाइएको जलहरीको विषयमा प्रश्न उठेपछि थापा प्रष्टीकरण दिनका लागि समितिको बैठकमा पुगेका थिए । तर, उनले उक्त प्रकरणमा कुनै पनि संलग्नता नभएको दाबी गर्दै आफूलाई समाजमा ‘सुन चोर’ भनेर चिनाइएको भन्दै गुनासो गरे ।
यतिसम्मकी उनी बैठकमै प्रष्टीकरण दिँदा दिँदै पटक पटक रोए । उनले पशुपतिको जलहरीमा एकरति पनि भ्रष्टाचार नभएको दाबी गर्दै दोषी ठहर भए मृत्युदण्डको सजाय दिएपनि भोग्न तयार रहेको बताएका छन् । ‘सुनको जलहरीको न्याय माग्न मैले पनि आत्महत्या गर्नुपर्ने हो ? म यो सुनको जलहरीको समितिको संयोजक हो, यसमा नेपाल राष्ट्र बैंकले गरेको सम्झौता अनुसार हामीले सुन ल्याएका छौँ ।’, उनले भने, ‘१०३ केजी सुन आएको छ । हामी राज्यको निकायबाट मनोनित भएपछि हामी कर्मचारी हो, राज्यले जे निर्देशन दिन्छ, त्यही गर्दा हामीले गल्ती गरेका हौं र ?’
‘१० केजी सुन पुगेन भने म मृत्युदण्ड लिन पनि तयार छु । आज मेरो गाँउभरि बेईज्जत भयो, मेरो दुई जना सन्तान छन् ।’, थापाले रुँदै भने, ‘म कमजोर होईन् तर राज्यले मलाई कमजोर बनाएको छ ।’ साथै थापाले नेपाली सेनाको निगरानीमा जलहरी निर्माण गरिएकोले सुन कम भए सेनाले पनि दोष भोग्नु पर्ने बताएका छन् । ‘अर्को कुरा नेपाली सेनाको विश्वास गर्ने कि नगर्ने ? सुनको जलहरीमा नेपाली सेनाको २४ घन्टा निगरानी थियो । सेनालाई विश्वास गर्ने कि नगर्ने ?’, बैठकमा प्रश्न गर्दै उनले भने, ‘यो सुन हराएकोमा सेनाले जिम्मेवारी लिने कि नलिने ? भनेर प्रधानसेनापतिसँग पनि कुरा गरेको छु ।’
