काठमाडौं । १५ करोड क्षतिपूर्तिको मागसहित काठमाडौं महानगरपालिकाका मेयर बालेन्द्र शाह (बालेन)विरुद्ध अदालतमा मुद्धा दायर भएको छ । शैक्षिक मेलामा रोक लगाएको भन्दै हिसानले १५ करोड क्षतिपूर्तिको माग गर्दै उच्च अदालत पाटनमा मेयर शाहविरुद्ध मुद्धा दायर गरेको हो ।

महानगरले शैक्षिक मेला बन्द गराएको भन्दे हिसान अदालत गएको हो । शिक्षा मन्त्रालयबाटै अनुमति लिएर सञ्चालन गरिएको मेला महानगरले अनावश्यक रुपमा बन्द गराएको हिसानको ठहर छ । मेला बन्द हुँदा आफूहरुको ३० करोड रुपैयाँ भन्दा बढीको क्षति भएको हिसानका वरिष्ठ उपाध्यक्ष युवराज शर्माले बताएका छन् ।

शिक्षा मन्त्रालयबाट अनुमति लिएर हिसानले काठमाडौंको भृकुटिमण्डपमा नयाँ कलेज खोजिरहेका विद्यार्थिलाई लक्षित गर्दै शैक्षिक मेलाको आयोजना गरेको थियो । तर, माध्यामिक शिक्षा परीक्षा एसइई र कक्षा १२ को नजिता नआउँदै भर्नाका लागि विद्यार्थी तान्ने उद्धेश्यले मेला आयोजना भएको भन्दै महानगरले उक्त शैक्षिक मेला बन्द गराएको थियो ।