काठमाडौं । काठमाडौं महानगरपालिकाले घरभाडा बाहेक अन्य आम्दानीको स्रोत नहुने घरधनीलाई ७५ प्रतिशत छुट दिने भएको छ । आगामी आर्थिक वर्षको आर्थिक विधेयक पेश गर्दै महानगरका मेयर बालेन्द्र शाह (बालेन)ले वार्षिक १ लाखभन्दा कम बहाल आम्दानी भएका र घरभाडा बाहेक अन्य कुनै पनि आम्दानीको स्रोत नभएका घरधनीलाई ७५ प्रतिशत छुट दिने घोषणा गरेका हुन् ।

तर, घारभाडाबाटै वार्षिक १ लाखभन्दा बढी आम्दानी गर्ने र आम्दानीका अन्य स्रोत रहेकाहरुले भने महानगरबाट कुनै पनि छुट पाउने छैनन् । महानगरबाट पाउने छुटका लागि कसैले बहाल करको रकम घटाएमा १० प्रतिशत जरिवाना लिइनेछ ।

मेयर शाहले महानगरभित्र व्यक्ति वा संस्थाले भवन, घर, पसल, ग्यारेज, गोदाम, टहरा, जग्गा, पोखरी वा अन्य सम्पत्ति पूर्ण वा आशिंक रुपमा बहाल लगाएकोमा बहाल कर संकलन गरिने जनाएका छन् । व्यावसायिक प्रयोग र प्रयोजनका लागि कुल बहाल रकमको वार्षिक १० प्रतिशतका दरले स्रोतमै करकट्टी गरी बहाल कर लिने महानगरले जनाएको छ ।

त्यस्तै, आवासीय प्रयोजनको कर दाखिला गर्ने दायित्व तथा जिम्मेवारी घरधनीको हुनेछ भने सम्पत्ति कर र बहाल कर एकैपटक असुल गरिने मेयर शाहले जानकारी दिएका छन् ।