काठमाडौं । नेपाल आयल निगमले भारतीय आयल कर्पोरेशन (आईओसी)लाई तिर्नुपर्ने ऋण चुक्ता गरेको छ । निमगले आईओसीलाई तिर्नुपर्ने २४ अर्ब रुपैयाँ ऋण तिरेको हो ।

१४ महिनादेखि तिर्न बाँकी रहेको २४ अर्ब ऋण जुन २३ तारिखमा आईओसीलाई तिरेको निगमका प्रवक्ता मनोज कुमार ठाकुरले बताएका छन् । ठाकुरका अनुसार ऋणको सम्पूर्ण साँवा रकम तिरे पनि अब ब्याजवापतको ४५ करोड रुपैयाँ तिर्न बाँकी रहेको छ । उक्त रकम पनि जुलाई ८ तारिखमा तिरिसक्ने ठाकुरले बताएका छन् ।

निगमले एक वर्षमा १७ अर्ब रुपैयाँ नाफा कमाएको थियो । सो नाफामा मूल्य स्थिरीकरण कोषको साढे तीन अर्ब र सरकारबाट भ्याटवापत फिर्ता आएको साढे तीन अर्ब रकम जोडेर ऋण तिरेको निगमले जनाएको छ । असारमा थप एक अर्ब रुपैयाँ नाफा हुने निगमको अनुमान रहेको छ ।