काठमाडौं । सेयर गुरु शिव चन्द्रले निर्माण गर्ने फिल्म ‘कोत पर्व’मा सौगात मल्ल अनुवन्धित भएका छन् । मुलुकको ऐतिहासिक राजनीतिक घटना कोतपर्वमाथि निर्माण हुन लागेको फिल्मको शीर्ष भूमिकामा अभिनेता सौगात मल्ल अनुबन्धित भएका हुन् ।
बुधबार ‘कोत पर्व’ फिल्मको निर्माण कम्पनी र अभिनेता मल्लबीच लिखित सम्झौतामा हस्ताक्षर भएको छ । फिल्मको शीर्षमध्येको भुमिकामा सौगात मल्ल रहने भए पनि उनको पात्रबारे खुलाइएको छैन । फिल्मको अन्य कलाकारहरु तय गर्ने क्रम भने बाँकी नै रहेको फिल्मका निर्देशक रिमेश अधिकारीले बताएका छन् ।
यसो त ‘कोत पर्व’को प्रमुख महिला पात्रमा नम्रता श्रेष्ठको चर्चा छ । तर, फिल्मको मुख्य महिला पात्रमा उनी नै हुन्छिन् वा अरु कोही हुन्छ भन्ने टुंगो लागिसकेको छैन । फिल्मको छायांकन आगामी चैतदेखि सुरु गर्ने तयारी रहेको निर्देशक अधिकारीले जानकारी दिएका छन् । अधिकारीका अनुसार उक्त फिल्मको पटकथा तीन वर्ष लगाएर लेखिएको हो । कथाले जंगबहादुर राणाको उदयको एक महत्वपूर्ण राजनीतिक घटनाक्रमलाई चित्रण गर्ने जनाइएको छ ।
रिमेश अधिकारी फिल्म्स प्रोडक्सन प्रालि र श्रीत फिल्म्स एण्ड इन्टरटेनमेन्टको ब्यानरमा फिल्म बन्न लागेको हो । आरसी शर्मा र शारदा खड्का अर्याल निर्माता रहेको फिल्मको पटकथा महेश दवाडीको छ । फिल्मको सहनिर्मातामा राजेन्द्र ढकाल र राजाराम सुवाल छन् भने कार्यकारी निर्मातामा सेयर गुरु शिव चन्द्र रहेका छन् ।
