काठमाडौं । स्पेस फोरके टेलिभिजनको अपरेशन निर्देशकमा डिजिटल मिडिया तथा कम्युनिटी प्लाटफर्म विज्ञ सन्तोष कुमार देवकोटा नियुक्त भएका छन । मंगलबार एक कार्यक्रमकाबीच टेलिभिजनका अध्यक्ष दिनेशकुमार शाहीले देवकोटालाई स्वागत गरेका हुन् ।
देवकोटासँग छापा तथा रेडियोका साथै डिजिटल प्लाटफर्ममा एक दशकभन्दा बढी काम गरेको अनुभव रहेको छ । देवकोटाले यसअघि नेपाली पात्रोमा प्रमुख कार्यकारी अधिकृतका रुपमा काम गरेका थिए । उनी हाम्रो पात्रोका पूर्व संस्थापक एमडीसमेत हुने भने नेपालको सर्वाधिक लोकप्रिय स्ट्याण्डअप कमेडी समूह ‘नेपग्याजमका संस्थापक निर्देशक पनि हुन् ।
२०५६ सालमा वीरगञ्जबाट प्रकाशित हुने सार्थक साप्ताहिकबाट सञ्चार क्षेत्रमा प्रवेश गरेका देवकोटा लामो समय रेडियो प्रसारणमा समेत आबद्ध रहेका थिए । पछिल्लो समय स्पेस फोरके टेलिभिजनमा प्रशारण हुने सामाग्रीका कारण यसप्रति आकर्षित भएको देवकोटाको भनाई छ । टेलिभिजनमा सन्तोष कुमार देवकोटाले व्यवस्थापनका साथै विशेष गरी डिजिटल प्लाटफर्मको प्रवर्द्धनमा काम गर्ने बताइएको छ ।
