काठमाडौं । सानिमा बैंक लिमिटेडको नाफा बढेको छ । बैंकले गत आर्थिक वर्षको चौथो त्रैमासम्मको अपरिस्कृत वित्तीय विवरण प्रकाशित गर्दै अघिल्लो आर्थिक वर्षको तुलनामा २५.१३ प्रतिशत बढी खुद नाफा आर्जन गरेको जनाएको हो ।
बैंकले अघिल्लो आर्थिक वर्षमा २ अर्ब ९ करोड ३१ लाख खुद नाफा आर्जन गरेको थियो । तर, गत आर्थिक वर्ष २०७९ ८० को सोही अवधिमा बैंकले खुद नाफा २ अर्ब ६१ करोड ९२ लाख रुपैयाँ रहेको छ ।
बैंकको खुद ब्याज आम्दानी र सञ्चालन मुनाफा बढेसँगै खुद नाफा बढ्न पुगेको हो । त्यस्तै, समीक्षा अवधिमा बैंकको वितरण योग्य मुनाफा २ अर्बभन्दा बढी रहेको छ । चौथो त्रैमाससम्म बैंकको यस्तो मुनाफा २ अर्ब २० करोड ९६ लाख रुपैयाँ रहेको छ ।
बैंकले सार्वजनिक गरेको विवरण अनुसार समीक्षा अवधिमा बैंकको खुद ब्याज आम्दानी ३९.५० प्रतिशत बढेको छ भने खुद फि तथा कमिशन आम्दानी ८.११ प्रतिशत घटेको छ । त्यस्तै, बैंकको कुल सञ्चालन आम्दानी समीक्षा अवधिमा २६.७७ प्रतिशत र सञ्चालन मुनाफा २७.९६ प्रतिशत बढेको छ ।
समीक्षा अवधिमा बैंकको नाफासँगै प्रतिसेयर आम्दानी (ईपीएस)मा पनि बढेको छ । यस अवधिमा बैंकको ईपीएस २ रुपैयाँ ५४ पैसा बढेर २१ रुपैयाँ २ पैसा पुगेको छ । असार मसान्तसम्ममा बैंकको मूल्य आम्दानी अनुपात १२.३९ गुणा रहेको छ भने प्रतिशेयर नेटवर्थ १५५ रुपैयाँ ५१ पैसा रहेको छ । १२ अर्ब ४६ करोड १ लाख रुपैयाँ चुक्ता पूँजी रहेको यस बैंकको जगेडा कोषमा ६ अर्ब ९१ करोड ६९ लाख रुपैयाँ सञ्चित छ । समीक्षा अवधिमा बैंकको निक्षेप ११.५१ प्रतिशत बढेको छ भने कर्जा लगानी ६.५० प्रतिशत बढेको छ ।
