काठमाडौं । गत आइतबार कागबेनीमा आएको बाढीमा पुरिएको प्रभु र नेपाल इन्भेष्मेन्ट मेगा बैंकको करोडौँ रुपैयाँ भेटिएको छ । ग्रेगान खोतल्ने क्रममा नेपाली सेना, प्रहरी र स्थानीयबासीको समूहले प्रभु र इन्भेष्टमेन्ट मेगा बैंकको करोडौँ रकम भेट्टाएका हुन् ।
बाढीमा पुरिएको प्रभु बैंकको ५१ लाख ६२ हजार २२६ रुपैयाँ शनिबार फेला परेको प्रमुख जिल्ला अधिकारी अनुप केसीले जानकारी दिएका छन् । केसीका अनुसार अचानक आएको बाढीले प्रभु बैंकको शाखामा पनि क्षति पुर्याको थियो । बैंकको हराएको ५१ लाख बढी रकम सोही बाढीमा पुरिएको थियो ।
त्यस्तै, आइतबार बाढीमै पुरिएको नेपाल इन्भेष्टमेन्ट मेगा बैंकको १ करोड ५ लाख ३२ हजार ९ सय ६४ रुपैयाँ पनि फेला परेको छ । बाढीको प्रभाव कम भएलगत्तै पुनर्निमाणकाका लागि बाढीले थुपारेको गेग्रान खोतल्ने क्रममा बैंकको १ करोड बढी रकम फेला परेको प्रजिअ केसीले बताएका छन् ।
हाल बाढी प्रभावित क्षेत्र कागबेनीमा नेपाली सेना, नेपाल प्रहरी, सशस्त्र प्रहरी तथा स्थानीय मिलेर पुनर्निमाणको काम गरिरहेका छन् । बाढीका कारण गत आइतबार दुवै बैंकमा क्षति पुगेको थियो ।
