काठमाडौं । चालु आर्थिक वर्षको पहिलो महिना अर्थात साउनमा रोजगारीका लागि विदेश जानेको संख्या ह्वात्तै घटेको छ । वैदेशिक रोजगार विभागका अनुसार चालु आर्थिक वर्षको साउनमा वैदेशिक रोजगारीमा जानेहरुको संख्या ७ हजार ४६४ जनालो घटेको हो ।
गत आर्थिक वर्षको साउनमा ६३ हजार ३९ जना नेपालीले वैदेशिक रोजगारीका लागि श्रम स्वीकृति लिएका थिए । तर, यसवर्ष साउनमा ५५ हजार ५७५ जना नेपालीहरुले नयाँ र पुनः श्रम स्वीकृति लिएका छन् । गत आर्थिक वर्ष २०७९ ८० मा मात्रै वैदेशिक रोजगारीका लागि ७ लाख ७१ हजार ३२७ जना नेपालीले श्रम स्वीकृति लिएका थिए ।
यसो त साउनमा मात्रै वैदेशि रोजगार व्यवसायीमार्फत २९ हजार २२४ र व्यक्तितगमा ७ हजार ५६८ जनाले श्रम स्वीकृति लिएको वैदेशिक रोजगार विभागको तथ्यांकमा उल्लेख छ । त्यस्तै, जीटूजी सम्झौता अनुसार साउनमा २ हजार ३६० जना नेपाली विदेशिएका छन् । यसरी साउन महिनामा श्रम स्वीकृति लिने महिलाको संख्या मात्रै ७ हजार ७२५ जना रहेको छ । जसमध्ये १३५ जना महिलाहरु रोजगारीका लागि कोरिया गएका छन् ।
नेपालबाट श्रम स्वीकृति लिएर विदेश जानेमध्ये अधिकांश नेपालीहरु यूएई जाने गरेको पाइएको छ । साउन महिनामा मात्रै ११ हजार ८७८ जना नेपालीले यूएईमा जानका लागि श्रम स्वीकृति लिएका छन् । त्यस्तै, रोजगारीका लागि विदेश जाने नेपालीहरुको रोजाईमा कतार, साउदी अरेबिया, मलेसिया, कुवेत, दक्षिण कोरिया रहेका छन् ।
