काठमाडौं । डिम्याट खाता नवीकरण नगरेका लगानीकर्ताले अव आईपीओ भर्न नपाउने भएका छन् । सिडीएससी एण्ड क्लियरिङ लिमिटेडले डिम्याट खाता नवीकरण नगरेका लगानीकर्ताको मेरो सेयर रोक्का राख्ने निर्णय कार्यान्वयनमा ल्याएको छ । सिडीएससीले डिम्याट नवीकरण नगरेका लगानीकर्ताको मेरो सेयर २०८० भाद्र १५ गते देखि रोक्का राख्ने जनाएको थियो ।

सोहि निर्णय अनुसार अव डिम्याट नवीकरण नगरेसम्म मेरो सेयर पनि खुल्ने छैन र आईपीओ वा हकप्रदमा पनि आवेदन दिन नपाइने भएको छ । लगानीकर्ताले आईपीओ वा हकप्रदमा आवेदन दिन डिम्याट नविकरण गरेकै हुनु पर्ने सिडीएससीले जनाएको छ ।

त्यस्तै, लगानीकर्ताले आफ्नो डिम्याट खाताको वार्षिक शुल्क प्रत्येक आर्थिक वर्ष समाप्त हुनु अगावै आफ्नो निक्षेप सदस्यलाई बुझाउनुपर्ने व्यवस्था छ । सो अनुसार शुल्क नबुझाउने लगानीकर्ताको हितग्राही खाता निक्षेप सदस्यले रोक्का राख्ने गरेको छ ।

सिडीएसको तथ्यांक अनुसार हाल डिम्याट खाताको संख्या ५८ लाख बढी रहेको छ । यी मध्ये करिब ३५ लाख खाता मात्र नवीकरण रहेको छ । बाँकि खाता नवीकरण भएका छैनन् । डिपी भनेर चिनिने डिम्याट खोल्ने कम्पनीहरुले करिब १७ लाख डिम्याट खाता नवीकरण हुन बाँकि रहेको तथ्यांक सिडीएसलाई उपलब्ध गराएका छन् । तर यो संख्या करिब २० लाख भएको सिडीएसको अनुमान छ ।