काठमाडौं । चाडपर्व नजिकिएसँगै पछिल्ला दिन बजारमा प्लाष्टिकका फूल र मालाको व्यापार बढेको छ । चाडपर्वमै धेरै खपत हुने भएर पनि होला केही समय अघिसम्म कहिँकतै नदेखिने प्लाष्टिकका फूल, माला तथा पुष्पगुच्छा अहिले बजारमा छ्यापछ्याप्ती भेटिन्छन् ।
यसो त काठमाडौं महानगरपालिकाले चालु आर्थिक वर्ष २०८० ८१ को सुरुवात अर्थात साउन १ गतेदेखि बाट प्लाष्टिकका फूलमाला तथा पुष्पगुच्छाको उत्पादन तथा बिक्रीवितरणमा रोक लगाएको थियो । तर, पनि बजारमा प्लाष्टिकका मालाको बिक्रीवितरण भने खुलेयाम भई नै रहेको छ ।
अझ १ असोज अर्थात विश्वकर्मा पूजाको दिन प्लाष्टिकका फूलगुच्छा तथा मालाको व्यापार राम्रै भयो । ‘विश्वकर्मा पूजा भएर पनि होला फूलमालाको व्यापार धेरै राम्रो भयो’, कोटेश्वरका एक व्यापारीले भने, ‘प्रयोग गर्न सजिलो भएर होला धेरै ग्राहकहरु प्लाष्टिककै माला र फूल खोज्छन् । हामीले माग अनुसार आयात गर्ने र बेच्ने मात्रै हो । दशैँ तिहारमा माग झन् बढ्ने अनुमान छ ।’
प्लाष्टिकका फूलमालामा लगाइएको प्रतिबन्धपछि पनि बजारमा प्लाष्टिकका फूलमाला देखिनु अनुगमन प्रभावकारी नहुनु रहेको स्वयम् महानगरपालिकाका एक कर्मचारीले स्वीकार गरेका छन् ।
‘प्रतिबन्धपछि पनि प्लाष्टिकका फूलमालाको कारोबार भइरहेको छ भन्दा अचम्म लाग्यो । तर, यो अनुगमन प्रभावकारी नहुँदा देखिएको समस्या हो ।’, महानगरका एक कर्मचारीले भने, ‘यसतर्फ महानगर सचेत छ । तत्कालै एक्सन लिन्छौँ ।’
