काठमाडौं । नेपाल बीमा प्राधिकरणले बीमा अभिकर्ताको परीक्षा लिने भएको छ । प्राधिकरणले कार्तिक महिनादेखि बीमा अभिकर्ताको परीक्षा अनिवार्य रुपमा लिने भएको हो ।
बीमा अभिकर्ताको परीक्षा लिनेबारे जानकारी प्राधिकरणले सम्पूर्ण जीवन बीमा कम्पनीहरूलाई पठाइसकेको छ । योसँगै अब कार्तिक महिनादेखि बीमा अभिकर्ता बन्न प्राधिकरणले लिने परीक्षा पास गर्नुपर्नेछ ।
त्यस्तै, कार्तिक महिनादेखि प्राधिकरणले अभिकर्ताहरूको परीक्षा सञ्चालन गर्ने हुँदा असोज २५ गतेदेखि आएराएमएस सिस्टममा अभिकर्ता दर्ता प्रक्रिया बन्द गरिनेसमेत प्राधिकरणले जनाएको छ ।
यसो त बीमा ऐनमा पनि बीमा मध्यस्थकर्तालाई इजाजत प्राप्त गर्नुअघि तोकिए बमोजिमको परीक्षा पास गर्नुपर्ने व्यवस्था रहेको छ । सोही ऐनमा टेकेर प्राधिकरणले बीमा अभिकर्ताको परीक्षा सञ्चालन गर्ने भएको हो । योसँगै अब प्राधिकरणले लिने परीक्षामा उत्तीर्ण भएपछि मात्रै कुनै पनि बीमा कम्पनीको बीमा अभिकर्ता बन्न पाइनेछ ।
