काठमाडौँ । सोमबारदेखि मोबाइल डिभाइस म्यानेजमेन्ट सिस्टम (एमडिएमएस) लागु हुने भएको छ । नेपाल दूरसञ्चार प्राधिकरणले प्रणालीमा दर्ता नभएका केही मोबाइलको नेटवर्क ‘लक’ गरेर सोमबारदेखि पहिलो चरणमा यो प्रणाली कार्यान्वयनमा ल्याउने भएको हो ।
अवैध मोबाइल नियन्त्रण गर्ने उद्देश्यले पटकपटक सञ्चालनको घोषणा गरिएको एमडिएमएस परीक्षणको एक वर्षपछि प्राधिकरणले यो प्रणाली सञ्चालन गर्न लागेको हो ।
प्रणालीमा दर्ता नभएका मोबाइलको नेटवर्क ‘लक’ गर्न सेवाप्रदायकलाई जानकारी गराइसकिएको प्राधिकरणले जनाएको छ । प्राधिकरणले एमडिएमएस लागू गर्नपूर्व कात्तिक ४ गते सार्वजनिक सूचना जारी गरेर १५ दिनभित्र दर्ता गरिसक्न जानकारी गराएको थियो । त्यसअघि पनि प्राधिकरणले बारम्बार एमडिएमएस प्रणालीमा मोबाइल दर्ता गराउन सार्वजनिक सूचना जारी गर्दै आएको थियो ।
सोमबारदेखि पहिलो चरणमा ‘हाइएन्ड’ मोबाइल लक गर्न सेवाप्रदायकलाई प्राधिकरणले निर्देशन दिइसकेको छ । योसँगै अबदेखि हरेक दिन दर्ता नभएका अवैध मोबाइलको नेटवर्क आफैँ ‘लक’ हुँदै जानेछन् ।
प्राधिकरणका अनुसार गतवर्ष असोजयता नेपाल भित्रिएका करिब २० लाख व्यक्तिगत मोबाइल सेट यो प्रणालीमा दर्ता छैनन् । त्यसका लागि प्राधिकरणले आफ्नो दर्ता प्रक्रियालाई पूर्ण रूपमा अनलाइन र निःशुल्क गरेको भन्दै प्रणालीमा दर्ता गराउन आग्रह गरेको छ ।
बजारमा अवैध मोबाइल खरिद हुनसक्ने जोखिमलाई ध्यानमा राख्दै प्राधिकरणले मोबाइल खरिदपूर्व त्यसको आइएमइआई दर्तापूर्व प्रणालीमा दर्ता भए/नभएको यकिन गर्न पनि सेवाग्राहीलाई आग्रह गरेको छ ।
