काठमाडौँ । पोखराको लेकसाइड २४सै घण्टा खुला राख्न अदालतले आदेश दिएको छ । बुधबार उच्च अदालत पोखराका कामु मुख्य न्यायधीश राजनप्रसाद भट्टराईको एकल इजलाशले लेकसाइड २४सै घण्टा खुला राख्न आदेश दिएको हो । अदालतले कानूनबमोजिम व्यापार व्यवसाय गर्न रोक्ने तथा रोक्न लगाउने कार्य नगर्न जिल्ला प्रशासन कार्यालय कास्कीको नाममा आदेश दिएको हो ।
मंगलबार देवीकुमारी बरालले जिल्ला प्रशासन कार्यालय कास्कीलाई विपक्षी बनाएर हालेको रिटमा सुनुवाई गर्दै अदालतले १५ दिनभित्र लिखित जवाफ पेश गर्न प्रशासन लगायतका विपक्षीलाई आदेश दिएको छ ।
पोखराको लेकसाइड २४सै घण्टा खोल्ने विषयमा के भएको हो ? निवेदकको माग अनुसारको आदेश कि जारी हुनु नपर्ने हो ? र निवेदकको मागअनुसारको आदेश जारी हुनु नपर्ने भए कारण एवम् प्रमाणसहित म्याद सूचना तामेल भएको मितिले १५ दिनभित्र लिखित जवाफ पेश अदालतले आदेश दिएको छ ।
तर, विगतदेखि नै लेकसाइड २४सै घण्टा खोल्नुपर्ने विषयमा बहस चले पनि प्रहरी प्रशासनले भने अहिलेको अवस्थामा लेकसाइड २४सै घण्टा खुला गर्न चुनौतिपूर्ण रहेको बताउँदै आएको छ ।
हाल कास्कीमा १ प्रहरी बराबर १ हजार सर्वसाधारण रहेकोले यही स्थितिमा २४सै घण्टा लेकसाइड खोल्दा सुरक्षा दिन कठिनाई हुने तर्क प्रशासनको छ । यद्यपी सरकारले बनाएको कार्यविधीअनुसार मापदण्ड पुर्याए २४सै घण्टा व्यवसाय खोल्न दिन सकिने प्रशासनको भनाई छ ।
