काठमाडौं । अव हाइलाइफ ब्राण्डका नेपाली उत्पादन अष्ट्रेलियामा बिक्री वितरण हुने भएका छन् । हाइलाइफ एग्रो एण्ड फुड इन्डष्ट्रिज लिमिटेडले अष्ट्रेलियाको लागि आधिकारिक बिक्रेताको रुपमा निलगिरी ग्रुपलाई नियुक्त गरेको छ । निलगिरी आधिकारिक बिक्रेताको रुपममा नियुक्त भएसँगै हाइलाइफका उत्पादनहरु अष्ट्रेलियामा बिक्री सुरु भएको हो ।
हाइलाइफले उत्पादन गर्ने समानहरु नेपाली बजारमा लोकप्रिय छन् । साथै, हाइलाइफका सबै प्रडक्टहरु स्वस्थकर रहेको कम्पनीले जनाएको छ । कम्पनीले चिउरा, कर्नफ्लेक्स, ओट्स, चिया सिड्स, सोयाविन, ग्रीन टि, चिजबललगायतका प्रडक्टहरु उत्पादन गर्छ । सबै प्रडक्टहरुले बजारमा राम्रो प्रतिक्रिया पाएको कम्पनीले जनाएको छ ।
अव अष्ट्रेलियामा पनि हाइलाइफका प्रडक्ट धेरैको रोजाईमा पर्ने कम्पनीले विश्वास लिएको छ । ‘अष्ट्रेलियामा धेरै नेपालीहरु बसोबास गर्ने भएकाले नेपाली प्रडक्टले अझ बढी माया पाउनेमा हामी विश्वस्त छौं,’ निलगिरी ग्रुपका लागि नेपालका कन्ट्री म्यानेजर अञ्जु बरालले भनिन् ।
त्यस्तै, निलगिरीले पहिलो चरणमा अष्ट्रेलियाका लागि हाइलाइफका उत्पादन निर्यात गरिसकेको छ । आगामी दिनमा त्यहाँको आवश्यकता अनुसार निर्यात गर्ने बरालले जानकारी दिइन् । ‘नेपाली ब्राण्ड निर्यात हुँदा देशको व्यापार घाटा घटाउन योगदान पुग्छ र नेपाली प्रडक्ट विदेशमा पुग्नेछ,’ उनले भनिन् ।
