काठमाडौँ । पछिल्लो तीन महिनामा विदेश जाने विद्यार्थीसँगै करिब ३३ अर्ब रुपैयाँ पनि विदेशिएको छ । नेपाल राष्ट्र बैंकले सार्वजनिक गरेको तथ्यांकअनुसार चालु आर्थिक वर्षको पछिल्लो तीन महिनामा नेपालबाट विद्यार्थीसँगै ३२ अर्ब ९२ करोड रुपैयाँ विदेशिएको हो ।
पछिल्लो तीन महिनामा विद्यार्थीसँगै विदेशिएको रकम गत आर्थिक वर्षको सोही अवधिको तुलनामा दोब्बर हो । गत आर्थिक वर्षमा नेपालबाट विद्यार्थीसँगै १७ अर्ब ८९ करोड रुपैयाँ विदेशिएको थियो ।
त्यस्तै, पहिलो त्रैमासमा नेपाल आउने पर्यटकको संख्या बढेसँगै भ्रमण आय ५१.३ प्रतिशत बढी अर्थात १७ अर्ब २ करोड रुपैयाँ रहेको छ । तर, राष्ट्र बैंकका अनुसार पछिल्लो ३ महिनामा सेवा आय भने २९ अर्ब ५६ करोड रुपैयाँ घाटामा रहेको छ ।
