काठमाडौँ । झापाको एक नगरपालिकाले देउसी खेल्न आउनेलाई १ सय ५१ रुपैयाँ मात्रै दक्षिणा दिन आह्वान गरेको छ ।

झापाको मेचीनगर नगरपालिकाले तिहारमा देउसी भैलो खेल्न आउनेलाई दक्षिणा १ सय ५१ रुपैयाँ मात्रै दिन आह्वान गरेको हो । शुक्रबार एक सूचना जारी गर्दै नगरपालिकाका मेयर गोपालचन्द्र बुढाथोकीले नगरबासीमा यस्तो आह्वान गरेका हुन् ।

त्यस्तै, नगरपालिका क्षेत्रभित्र राती १० बजेसम्म मात्रै देउसी खेल्न पाइनेछ । देउसी खेल्दा अन्य तथा छरछिमेकमा असर नपर्ने गरी देउसी खेल्न समेत नगरपालिकाले आग्रह गरेको छ ।

तिहारमा देउसी खेल्दा सामाजिक सद्भाव नबिगार्ने तथा संस्कृतिको जगेर्ना गर्नेगरी देउसी खेल्न पनि नगरपालिकाले आग्रह गरेको छ ।