काठमाडौँ । लाभांश पारित गर्न ग्लोबल आइएमई बैंकले साधारण सभा बोलाएको छ । बैंकले गत आर्थिक वर्षको मुनाफाबाट सेयरधनीका लागि घोषणा गरेको लाभांश पारित गर्न मंसिर २८ गतेका लागि साधारणसभा बोलाएको हो ।
बैंकले सेयरधनीका लागि कुल चुक्ता पूँजीको ८ प्रतिशत नगद लाभांश र १ प्रतिशत बोनस सेयर गरी कुल ९ प्रतिशत लाभांश वितरण गर्ने घोषणा गरेको थियो । मंसिर २८ गते नेपाल प्रज्ञा प्रतिष्ठानमा हुने साधारणसभाले उक्त लाभांश पारित गर्नेछ । सो लाभांश पारित भएपछि सेयरधनीमा वितरण गरिनेछ ।
त्यस्तै, बैंकको साधारणसभामा संस्थापक समूहबाट तीन जना र सर्वसाधारण सेयरधनी समूहबाट तीन जना गरी ६ जना संचालकहरुको निर्वाचन समेत हुनेछ । बैंकका अनुसार सोही साधारणसभा मार्फत सञ्चालकहरुले बैठक भत्ताबापत पाउने सेवासुविधा पनि वृद्धि गरिनेछ ।
साधारणसभाका लागि बैंकले मंसिर १३ गते सेयरधनी दर्ता पुस्तिका बन्द (बुक क्लोज) गर्ने भएको छ । मंसिर १२ गतेसम्म सेयर कायम रहेका सेयरधनी साधारणसभामा सहभागी हुन सक्नेछन् ।
