काठमाडौँ । काठमाडौँमा ट्याक्सीमा छुटेको ७ तोला सुन ट्याक्सी चालकले फिर्ता गरेका छन् । शनिबार दिउँसो जडिबुटीबाट जोरपाटी जानेक्रममा बा २ ज ३४५३ नम्बरको ट्याक्सीमै छुटेको यात्रुको ७ तोला सुन र ४ तोलाका चाँदीका गहना ट्याक्सी चालक रोशन बयलकोटीले फिर्ता गरेका हुन् ।

रोशनले उक्त सुनचाँदीका गहना काठमाडौँ उपत्यका ट्राफिक प्रहरी कार्यालयमा बुझाएका हुन् । प्रहरीका अनुसार ट्याक्सीमा छुटेको सुनचाँदीका गरगहनासहितको झोला लिएर ट्याक्सी चालक रोशन स्वयम् ट्राफिक कार्यालयमा पुगेका थिए ।

हाल प्रहरीले उक्त गरगहना रामेछापकी संगिता तामाङलाई हस्तान्तरण गरेको छ ।

प्रहरीका अनुसार ट्याक्सीमा सुनचाँदीका गहना छुटेको भन्दै तामाङले ट्राफिक प्रहरीको हटलाइन नम्बर १०३ मा खबर गरेकी थिइन् । तामाङले दिएको जानकारी अनुसार प्रहरीले सिसिटिभी क्यामेराको सहयोगमा उक्त ट्याक्सी चालकको खोजी गरिरहेको थियो । सोही क्रममा ट्याक्सी चालक रोशन आफैँ उक्त सामान लिएर ट्राफिक कार्यालय पुगेका थिए ।

सामान पाएसँगै झोलाधनीले ट्याक्सी चालक रोशनलाई धन्यवाद दिएका छन् । पछिल्लो समय काठमाडौँमा बस तथा ट्याक्सीमा छुटेका सामान प्रहरीमा परेको निवेदनका आधारमा ट्राफिक प्रहरीको खोजतलास शाखाले खोजी गरेर फिर्ता गर्दै आएको छ ।