काठमाडौँ । भिजन लुम्बिनी उर्जा कम्पनीको आइपिओ मंगलबार बाँडफाँड हुँदैछ । बिक्री प्रबन्धक मुक्तिनाथ क्यापिटलका अनुसार मंगलबार बिहान ९ बजे आफ्नै कार्यालय नारायणचौर, नक्साल काठमाडौंमा आइपिओ बाँडफाँड हुने भएको हो ।
क्यापिटलका अनुसार कम्पनीको आईपीओमा मागभन्दा ६.५४ गुणा बढी आवेदन परेको छ । यसर्थ आईपीओ गोलाप्रथाबाट बाँडफाँड हुनेछ । यसमा ११ लाख ९४ हजार ८२० जनाले कुल १ करोड ३५ लाख ७६ हजार १६० कित्ताका लागि आवेदन दिएका छन् । जसमा २ लाख ७ हजार ५२८ जनाले मात्र सेयर हात पार्नेछन् । बाँकी ९ लाख ८७ हजार २९२ जनाको भने हात खाली हुनेछ ।
कम्पनीले कात्तिक १६ गतेदेखि २० गतेसम्म सर्वसाधारणका लागि कुल २० लाख ७५ हजार २८५ कित्ता साधारण सेयर निष्कासन गरेको थियो । कम्पनीले स्थानीय बासिन्दाले आवेदन नदिएको ४ लाख ८७ हजार ९१० कित्ता सेयरसमेत थप गरेर सर्वसाधारणलाई उक्त आइपिओ बिक्रीमा ल्याएको हो ।
रेटिङ एजेन्सी इन्फोमेरिक्स क्रेडिट रेटिङ नेपालले यो आइपीओलाई ‘आइआरएन डबल बी माइनस इस्यूआर’ रेटिङ प्रदान गरेको छ ।
