काठमाडौं । भिजन लुम्बिनी उर्जा कम्पनीको आईपीओ बाँडफाँड भएको छ । कम्पनीको आईपीओ मंसिर ५ गते मंगलबार बाँडफाँट भएको हो ।
बिक्री प्रबन्धक मुक्तिनाथ क्यापिटलका अनुसार २ लाख ७ हजार ५ सय २३ जनाले १० कित्ता र ५ जनाले ११ कित्ता गरी कुल २ लाख ७ हजार ५ सय २८ जनाले सेयर हात परेका छन् ।
कम्पनीले कार्तिक १६ गतेदेखि २० गतेसम्म सर्वसाधारण लगानीकर्ताका लागि कुल २० लाख ७५ हजार २ सय ८५ कित्ता साधारण सेयर निष्काशन गरेको थियो । उक्त आइपीओमा कुल ११ लाख ६१ हजार ५ सय २९ जनाले आवेदन दिएकोमा ४ हजार ६ सय २ जनाको आवेदन रद्द भएको थियो । योग्य ११ लाख ५६ हजार ९२७ जना आवेदकलाई गोलाप्रथा मार्फत सेयर बाँडफाँड गरिएको मुक्तिनाथ क्यापिटलले जनाएको छ ।
आईपीओको नतिजा बिक्री प्रबन्धकको वेबसाइट वा भिजन लुम्बिनी उर्जाको वेबसाइट तथा सीडीएस एण्ड क्लियरिङको वेबसाइटबाट पनि हेर्न सकिन्छ ।
