काठमाडौँ । नेपालको पहिलो केबलकार सेवा मनकामना केबलकारले २५ वर्ष पूरा गरेको छ । स्वप्नदर्शी उद्यमी स्वर्गीय लक्ष्मणबाबु श्रेष्ठको परिकल्पना आँट र लगानीमा सुरु भएको मनकामना केबुलकारले २५ वर्ष पुरा गरेको हो ।
कम्पनीले एक सुचना जारी गर्दै केबलकारको सञ्चालक कम्पनी मनकामना दर्शन प्रालिले आगामी दिनमा अझ स्तरीय दिने प्रतिबद्धता व्यक्त गरेको छ । कम्पनीले माता मनकामनाको असीम अनुकम्पा र यात्रुजनको स्नेहले मनकामना केबुलकार सेवा यातायातको क्षेत्रमा विशिष्ट इतिहास रच्न सफल भएको छ ।
यस्तै, कम्पनीले आफ्नो २५औं वार्षिकोत्सवको उपलक्ष्यमा नेपालमा केबुलकार सेवाको परिकल्पनाकार एवं संस्थापक स्वर्गीय लक्ष्मणबाबु श्रेष्ठको साहसिक एवं ऐतिहासिक निर्णयको स्मरण गर्दै उनिप्रति भावपूर्ण श्रदा अर्पण गरेको छ ।
केबलकार सेवाले हिन्दुहरुको प्रसिद्ध तीर्थस्थल मनकामना र वरपरको क्षेत्रलाई पर्यटकीय गन्तव्यको रुपमा स्थापित गराउन अतुलनीय योगदान गरेको छ । उक्त सेवा शुभारम्भ भएसँगै आन्तरिक र विश्वभरका पर्यटक आकर्षित गर्न सफल गन्तव्यको रुपमा स्थापित भएको छ ।
मनकामना दर्शन प्रालि २०५३ कात्तिक २२ गते स्थापना भएको कम्पनी हो । प्रालिले २०५४ माघको अन्तिम साता केबुलकार निर्माण प्रारम्भ गरी २०५५ मंसिर ८ गतेबाट व्यावसायिक सेवा सुरु गरेको हो । देशमा सशस्त्र द्वन्द्व चलिरहेको बेला अनेकौं चुनौतीको सामना गर्दै ठूलो लगानीमा केबुलकार सेवा सञ्चालन गरेर कम्पनीले ठूला लगानीकर्ता एवं उद्यमी व्यवसायीमा उत्साह जगाउने काम गरेको थियो ।
मनकामना केबुलकारको थालनीले नेपालमा लगानीको ठूलो सम्भावना रहेको सन्देश पनि प्रवाह गरेको थियो । सुरुका २-४ वर्ष अपेक्षाअनुरुप यात्रु नआए पनि अविचलित सेवालाई निरन्तरता दिएको छ । २५ वर्ष पूरा गरी २६ वर्षमा प्रवेश गरेको अवसरमा कम्पनीकोे परियोजनामा ऋण लगानीको अगुवाइ गर्ने नेपाल बैंक तथा अन्य लगानीकर्ता राष्ट्रिय वाणिज्य बैंक र तत्कालीन नेपाल बंगलादेश बैंकको योगदानको पनि कम्पनीले स्मरण गरेको छ ।
त्यस्तै, सेवा सुरु गरेको ६ वर्षमा ऋण चुक्ता गर्ने लक्ष्य रहेकोमा तत्कालीन विषम परिस्थितिकाकारण ऋण चुक्ता गरिसक्न ७ वर्ष लागेको कम्पनीले जनाएको छ । कम्पनीले २५ वर्षको समयमा केबुलकारको एनालग प्रविधिलाई नवीनतम डिजिटल प्रणालीमा स्तरोन्नति गरेको कम्पनीका प्रबन्ध निर्देशक राजेशबाबु श्रेष्ठले जानकारी दिएका छन् ।
अस्ट्रियाको डोपलमेयर कम्पनीको डिजिटल प्रणालीमा स्तरोन्नति गर्ने काम सन् २०२१ मै सम्पन्न गरिसकेको छ । कम्पनीले बाँकी काम आगामी सन् २०२४ को भदौ-असोजमा सम्पन्न गर्ने योजना अनुसार काम गरीरहेको छ । सोको लागि आवश्यक केही उपकरण आयात भइसकेको छ । अबको चरणमा नियन्त्रण प्रणाली , सञ्चार केबुलका साथै केबुलकारलाई केबुलको लठ्ठा फेरेर पहिलेकै जस्तो नयाँ र स्तरीय प्रविधिको स्वरुपमा सञ्चालन हुनेछ । केबुलकार स्तरोन्नति गर्न करिब ४५ करोड रुपैयाँ लगानी हुनेछ ।
कम्पनीका प्रबन्ध निर्देशक श्रेष्ठले भने, ‘सन् २०२४ को अन्त्यमा वा २०२५ सुरुबाटै सञ्चालन गर्ने गरी मनकामनामा केबुलकार हाताभित्र सुविधा सम्पन्न रिसोर्ट निर्माण भइरहेको छ । ४० कोठाको यो रिसोर्टमा स्विमिङ पुल, हेल्थ क्लब, सभा–सेमिनार हल र रेस्टुरेन्टको सुविधा हुनेछ । हाम्रो भगिनी संस्था रिसोर्टस् बाई मनकामना केबुलकार प्रालिको नामबाट सञ्चालन हुने उक्त रिसोर्टमा लगानी करिब ५५ करोड रुपैयाँ हुने अनुमान छ । रिसोर्ट सञ्चालनमा आएपछि मनकामना र वरिपरिका क्षेत्रलाई धार्मिक र अन्य पर्यटकीय गन्तव्य बनाउने हाम्रो लक्ष्य छ ।’
मनकामना केबुलकारले सुरुआती वर्षमा २-३ लाख यात्रुलाई सेवा दिएकोमा अहिले बढेर वार्षिक ११ लाख यात्रुलाई सेवा दिइरहेको छ । यस वर्ष १२ लाख ५० हजार यात्रुलाई सेवा दिने लक्ष्य लिएको हो ।
त्यस्तै, सामाजिक, परोपकारी एवं पुण्य कार्यलाई पनि व्यवसायलाई सरह प्राथमिकता दिनुपर्छ भन्ने संस्थापक स्वर्गीय श्रेष्ठको दर्शनलाई केन्द्रमा राखेर मनकामना दर्शन प्रालिले मनकामना र आसपासका क्षेत्रको विकास, स्वास्थ्य, शिक्षा तथा विपन्न वर्ग र जातिलाई सहयोग गर्दै आएको छ । विनाशकारी भूकम्पको बेला कम्पनीले पश्चिम गोरखाका ७-८ गाविसलाई राहत सामग्री उपलब्ध गराएको थियो ।
संस्थागत सामाजिक उत्तरदायित्व अन्तर्गत कम्पनीले केबुलकार टिकटबाट भएको आम्दानीको १-१ प्रतिशत रकम सहिद लखन गाउँपालिका गोरखा र इच्छाकामना गाउँपालिका चितवनलाई विकास निर्माण, शिक्षा, स्वास्थ्य, संस्कृति सम्पदा जगेर्ना, विपन्न वर्गको हित तथा दैवी प्रकोपको लागि भनी वर्षेनि सहयोग गर्दै आएको छ । साथै, उत्कृष्ट करदाताको रुपमा सम्मानित हुँदै आइरहेको छ ।
कम्पनीलाई यस ठाँउसम्म आइपुग्न मदत गर्ने सम्पूर्ण यात्रु, गोरखाको सहिद लखन र चितवनको इच्छाकामना गाउँपालिका, दुवै गाउँपालिकासम्बद्ध व्यक्तित्वहरु, स्थानीय प्रशासन, नेपाल प्रहरी, सशस्त्र प्रहरी, विभिन्न सरकारी निकाय तथा कम्पनीलाई प्रत्यक्ष वा अप्रत्यक्ष रूपमा सहयोग गर्ने सम्पूर्णमा कम्पनीले आभार व्यक्त गरेको छ ।
कम्पनीले आफ्ना कर्मचारीको लगनशीलता र योगदानको उच्च कदर गर्दै सबैमा आभार व्यक्त गरेको हो ।
