काठमाडौँ । सुनसरीमा मिटरब्याज पीडितको ३३ बिघा जग्गा फिर्ता गराइएको छ । पीडितले दिएको उजुरीका आधारमा जिल्ला प्रशासन कार्यालय सुनसरीले मिटरब्याज पीडितको ३३ बिघा जग्गा फिर्ता गराएको हो ।

उजुरीका आधारमा पीडित र मिटरब्याजीबीचको आपसी छलफलपछि धितोबापत राखिएको ३३ बिघा जग्गा फिर्ता गराइएको जिल्ला प्रशासन कार्यालय सुनसरीका सहायक प्रमुख जिल्ला अधिकारी ओम भट्टराईले बताएका छन् । भट्टराईका अनुसार हालसम्म प्रशासन कार्यालयमा परेका उजुरीमध्ये २३५ वटा उजुरी फस्र्यौट भएका छन् ।

देशव्यापी आन्दोलन उठेपछि सरकारले मिटरब्याजलाई अपराध मानेर कानुनी दायरामा ल्याउन काम अघि बढाएको छ । २०७९ साउन २८ गते गृह मन्त्रालयले परिपत्र जारी गर्दै जिल्ला प्रशासनमा उजुरी दिन मिटरब्याज पीडितलाई आहृवान गरेको थियो ।

मंसिर मसान्तसम्म सुनसरी प्रशासनमा ६१४ उजुरी परेका थिए । ती मध्ये ४६० उजुरीमाथि छलफल भएको प्रशासनले जनाएको छ ।