">
काठमाडौँ । सर्वोत्तम सिमेन्टले २५ पुष (बुधबार)देखि प्राथामिक सेयर (आईपीओ) मा आवेदन खुला गरेको छ । कम्पनीले पहिलो पटक बुक बिल्डिङ विधिबाट आईपीओ जारी गरेको हो । पहिलो चरणमा कम्पनीले प्रभावित स्थानीय र वैदेशिक रोजगारीमा रहेका नेपालीहरुका लागि आईपीओ जारी गरेको हो ।
कम्पनीले पुष २५ गतेदेखि खुला गरेको आईपीओमा प्रभावित क्षेत्र नवलपरासीको सुनवल नगरपालिका वडा नम्बर ३, ४, ५, ६ र १३ तथा उत्खनन् प्रभावित क्षेत्र पाल्पाको रैनादेवी छहरा गाउँपालिका वडा नम्बर १ र २, रिब्दीकोट गाउँपालिका वडा नम्बर २, ३, ४ र ६, तिनाउँ गाउँपालिकाकाको वडा नम्बर ७ र ८ र निस्दी गाउँपालिकाको वडा नम्बर ७ का स्थानीयले ९ लाख ३० हजार कित्ताका लागि आवेदन दिन पाउनेछन् ।
त्यस्तै, वैदेशिक रोजगारीमा रहेका नेपालीहरुले कम्पनीको २ लाख ६७ हजार कित्ताका लागि आवेदन दिन सक्नेछन् । आवेदन दिँदा लगानीकर्ताले प्रतिकित्ता ३६० रुपैयाँ ९० पैसाका दरले आवेदन दिनुपर्नेछ ।
लगानीकर्ताले कम्पनीको आईपीओमा न्यूनतम ५० कित्तादेखि अधिकतम १० हजार कित्तासम्मका लागि आवेदन दिन सक्नेछन् । कम्पनीको आईपीओमा प्रभावित क्षेत्रका स्थानीयले छिटोमा माघ १० र ढिलोमा माघ २५ गतेसम्म आवेदन दिन सक्नेछन् । त्यस्तै, वैदेशिक रोजगारीमा रहेका नेपालीहरुले भने माघ १० गतेसम्म आवेदन दिन सक्नेछन् ।
कम्पनीको सेयर निष्कासन तथा बिक्री प्रबन्धक ग्लोबल आइएमई क्यापिटल रहेको छ भने सह निष्कासन तथा बिक्री प्रबन्धक एनआईएमबी एस क्यापिटल र प्रभु क्यापिटल लिमिटेड रहेको छ ।
