काठमाडौँ । एनसेलको सेयर खरिदबिक्री सम्बन्धी छानबिन समितिले बुझाएको प्रतिवेदन उपलब्ध गराउन प्रतिनिधि सभाको लेखा समितिले सरकारलाई निर्देशन दिएको छ । समितिले प्रधानमन्त्री तथा मन्त्रिपरिषद्को कार्यालयलाई एनसेलको ८० प्रतिशत सेयर खरिदबिक्रीबारे समितिले बुझाएको प्रतिवेदन तत्काल उपलब्ध गराउन निर्देशन दिएको हो ।

एनसेलको सेयर खरिदबिक्रीबारे अध्ययन गर्न सरकारले गठन गरेको उच्च स्तरीय छानविन समितिले प्रधानमन्त्री पुष्पकमल दाहाल (प्रचण्ड)लाई माघ १५ गते छानबिन प्रतिवेदन बुझाइसकेको छ ।

सरकारलाई बुझाएको प्रतिवेदनमा छानबिन समितिले एनसेलको ८० प्रतिशत सेयर खरिदबिक्री प्रक्रियामा कैफियत देखिएको र यथास्थितिमा स्वीकार गर्न उपयुक्त नहुने निष्कर्ष निकालेको थियो । योसँगै समितिले एनसेलको सेयर खरिदबिक्री कार्यमा अनुमति दिन नमिल्ने सुझाव दिएको थियो ।

सोही अनुसार लेखा समितिले छानबिन समितिले बुझाएको प्रतिवेदनको एक प्रति समितिमा उपलब्ध गराउन सरकारलाई निर्देशन दिएको हो ।