• सुदर्शन श्रेष्ठ/अर्थ सरोकार सुदूरपश्चिम ब्युरो

धनगढी । कैलालीमा जारी निषेधाज्ञालाई २० गतेसम्म लम्ब्याईएको छ । कोरोना भाइरस (कोभिड १९) को संक्रमणको चेन बे्रक गर्नका लागि जारी गरिएको निषेधाज्ञा लम्ब्याइएसँगै कैलालीमा थप कडाई समेत गरिएको छ । कोभिड नियन्त्रण सम्बन्धी जारी गरिएको अध्यादेशको कार्यान्वयन गर्दै कैलालीमा पनि निषेधाज्ञामा कडाई गरिएको हो ।

कोरोना संक्रमण रोकथाम तथा नियन्त्रणका लागि कैलाली जिल्लाभर जारी गरिएको निषेधाज्ञा जेठ २० गतेसम्मका लागी थप गरिएको छ । दिनप्रतिदिन संक्रमण दर बढ्दै गईरहेको र अवस्था बिग्रिन सक्ने सम्भावनालाई मध्यनगर गर्दै जिल्ला प्रशासन कार्यालय कैलालीले थप कडाई साथ निषेधाज्ञा लम्ब्याएको जिल्ला प्रशासन कार्यालय कैलालीका सुचना अधिकारी शिवराज जोशीले बताए । 

‘कोभिड नियन्त्रण सम्बन्धी अध्यादेश जारी गर्दै निषेधाज्ञा कडाईका साथ पालना गराउन निर्देशन दिईसकेका छौँ’, उनले भने, ‘यसले थप सहयोग गरेको छ ।’ बिहिबार मात्रै निषेधाज्ञाको अवज्ञा गर्नेलाई अध्यादेश बमोजिम कारवाही गरेको बताउँदै जोशीले आउँदा दिनमा झनै कडाईका साथ अगाडी बढ्ने बताए ।

निषेधाज्ञा लम्ब्याउनेसँगै कडाईका लागि प्रशासनले जारी गरेको आदेशको पालनाका लागि धनगढी लगाएत कैलालीका विभिन्न ठाउँहरुमा प्रहरीको उपस्थितिलाई बाक्लो बनाईएको छ । यस्तै धनगढीका मुख्य सडकहरुमा पनि चेकिङलाई तिव्रता दिईएको छ । आउँदो केहि साता सबैका लागि असहज हुने देखिएपति सरकारले जारी गरेका नियमको पालना गरे कोभिडको संक्रमणलाई नियन्त्रण गर्न सकिन्छ । यसतर्फ सम्बन्धित निकाय र नागरिकपनि सचेत हुन आवस्यक छ ।