काठमाडौँ । सरकारले कर्मचारीको संख्या घटाउने भएको छ । सार्वजनिक खर्चलाई मितव्ययी तथा प्रभावकारी बनाउने सम्बन्धी मापदण्ड, २०८१ जारी गर्दै सरकारले सरकारी कर्मचारीको संख्या घटाउने तयारी गरेको हो ।
उक्त मापदण्डअनुसार सरकारले केन्द्र सरकार, प्रदेश सरकार र स्थानीय तह मातहतका कर्मचारी घटाइने भएको छ ।
‘नेपाल सरकारको केन्द्रीय, प्रदेशस्तरीय र स्थानीय संरचनाहरु क्रमशः कम गर्ने र तद्अनुरुप विद्यमान दरबन्दीको संख्या घटाउने गरी संगठन पुनर्संरचना गर्दै संगठन संरचना छरितो र कामयाबी बनाउँदै लगिनेछ ।’, मापदण्डमा भनिएको छ ।
त्यस्तै, सरकारले सोही मापदण्डमा सरकारी कार्यालयबाट आयोजना हुने सभा, गोष्ठी, तालिम र सेमिनारहरु तारे होटलमा गर्न नपाइने व्यवस्था गरेको छ । उक्त मापदण्ड कार्यान्वयनमा आएसँगै तालिम, गोष्ठी, सेमिनार, बैठक र अन्तरक्रियाजस्ता कार्यक्रम आफ्नै सभाहल वा बैठक हलमा गर्नुपर्नेछ । सकेसम्म यस्ता कार्यक्रम अनलाइन प्रविधिको माध्यमबाट गर्नुपर्ने पनि मापदण्डमा उल्लेख छ ।
त्यसबाहेक विदेशी अतिथि तथा पाहूनाको सत्कार बाहेक अन्य अवस्थामा सरकारी खर्चमा भोजभतेर वा उत्सव मनाउन नपाइने पनि मापदण्डमा भनिएको छ ।
