काठमाडौँ । विपक्षी दलहरुले भिजिट भिसा प्रकरणमा नाम मुछिएका गृहमन्त्री रमेश लेखकले राजिनामा नदिए र उनीमाथि छानविन नभए संसद् चल्न नदिने अडान लिएपछि सत्तापक्षले पेलेरै अघि बढ्ने तयारी गरेको छ ।
भिजिट भिसा प्रकरण सतहमा आएदेखि नै गृहमन्त्रीको राजिनामा माग्दै विपक्षी दलहरुले संसद्मा अवरोध गर्दै आएका छन् ।
आइतबार पनि संसद्को अवरोध हटाउन प्रतिनिधि सभाका समाभुख देवराज घिमिरेले प्रमुख सचेतकहरुसँग छलफल गरेका थिए । तर, छलफल निष्कर्षविहीन भएपछि सभामुख असन्तुष्ट बनेका छन् । यता सत्तापक्ष भने संसद्को गतिरोध नहटे पेलेरै संसद्को कारवाही अघि बढाउने तयारीमा छन् ।
सञ्चारकर्मीसँग कुरा गर्दै नेपाली काँग्रेसका प्रमुख सचेतक श्याम घिमिरेले संसद् सञ्चालनमा विपक्षी दलहरुले असयोग गरे पनि संसद्को कारवाही नरोक्ने बताएका छन् । उनले संसद्को गतिरोध हटाउन आग्रह र पटक पटक छलफल गर्दा पनि विपक्षी दलले सहयोग नगरेको भन्दै अब सहयोग नगरे पनि पेलेरै संसद् सञ्चालन गर्ने बताएका छन् ।
विपक्षी दलहरुले भने गृहमन्त्री राजिनामा नदिएसम्म र गृहमन्त्रीमाथि छानविन नहुने भएसम्म संसद् चल्न नदिने अडान लिँदै आएका छन् ।
