काठमाडौँ । जगदम्बा स्टिलले पनि बिजुलीको बक्यौता तिर्न सुरु गरेको छ । पैसा नतिरेसम्म उद्योगमा लाइन नजोडिने देखेपछि स्टिलले पहिलो किस्ताबाट ५ करोड ७२ लाख रुपैयाँ तिरेको हो ।
शंकर ग्रुप अन्तर्गतको जगदम्बा स्टिलले बुधबार पहिलो किस्ता बापतको ५ करोड ७२ लाख रुपैयाँ बराबरको चेक बुझाएको विद्युत प्राधिकरणका एक अधिकारीले पुष्टि गरेका छन् ।
डेडिकेटेड तथा ट्रंक लाइनमार्फत बिजुली प्रयोग गरेबापत उद्योगले तिर्नुपर्ने बक्यौताको पहिलो किस्ता बापतको पैसा तिरेपछि उद्योगमा प्राधिकरणले लाइन जोडिदिएको छ । जगदम्बा स्टिलले बिजुली बालेको कुल ४ अर्ब १४ करोड तिर्न बाँकी छ ।
बिजुलीको बक्यौता विवादमा उद्योगहरुले पैसा तिर्न अटेर गरेपछि प्राधिकरणले उद्योगहरुमा लाइन काटेको थियो । हालसम्म १६ उद्योगहरुले बक्यौताको पहिलो किस्ता तिरिसकेका छन् ।
