काठमाडौँ । कैलाश बिकास बैंकको वालिङ शाखाका एक कर्मचारीले ऋणी लीला कंडेलको हस्ताक्षर किर्ते गरी लिलामी प्रक्रिया अगाडी बढाएको खबर अर्थ सरोकार डटकमले सार्वजनिक गरेपछि बैंकले कर्मचारी जीवन कुमार मल्ल र वालिङ शाखा प्रबन्धक मोति कुँवरलाई कार्वाही गरेको छ । अर्थ सरोकारले स्थलगत रिपोर्ट बनाएर प्रशारण गरेपछि बैंकको इन्सपेक्सन टोली उक्त शाखामा पुगेको थियो । इन्सपेक्सन टोलीले बैंकका कर्मचारी जीवन कुमार मल्लको दोष रहेको ठहर गरेको छ भने यस प्रकरणमा बैंकका शाखा प्रबन्धक पनि जिम्मेवार भएको भन्दै दुबैलाई कार्वाहीको सिफारिस गरेको थियो ।
यस्तो थियो अर्थ सरोकारले तयार गरेको स्थलगत रिपोर्ट
अर्थ सरोकारले तयार गरेको रिपोर्ट नम्बर १
जीवन कुमार मल्लसहित बैंकका उक्त शाखाका शाखा प्रबन्धक मोति कुँवरलाई समेत बैंकले कार्वाही गरेको हो । अर्थ सरोकार डटकमसँग कुरा गर्दै तत्कालीन शाखा प्रबन्धक मोति कुँवरले आफु र जीवन कुमार मल्लमाथि बैंकले कारवाही गरेको र दुइ जनालाई नै बैंकले सस्पेन्ड गरेको स्वीकारेका छन् । उनीहरुलाई कार्वाहीको पत्र सम्बन्धित व्यक्तिहरुको हातमा पुगिसकेको छ । यद्यपी बैंकको कार्वाहीले मात्र नपुग्ने भन्दै पीडीत दिपेन्द्र कंडेल बैंकका कर्मचारीलाई अदालतमा मुद्धा हाल्ने तयारीमा छन् । बैंकलेसमेत कार्वाही गरिसकेकाले अव यस्तो गलत काम गर्ने कर्मचारीले सजाय पाउने सम्भावना निकै बढेको छ ।
कुँवर भन्छन्, ‘बैंक छोड्नुपर्यो, मेरो करियर सिद्धियो’
मोति कुँवर र जीवन कुमार मल्लमाथि भएको कार्वाहीका बारे बुझ्न अर्थ सरोकारले मोति कुँवरलाई फोन गर्दा उनले बैंकले आफुलाई कार्वाही गरेको पुष्टी गरेका छन् । ‘हामी दुइ जनालाई कार्वाही गरियो । मैले बैंक छोडें। मेरो करियर सिद्धिएको अनुभव भएको छ ।’ उनले भने ।
