काठमाडौँ –  निरन्तर १२ दिन ओरालो लागेको शेयर बजारमा आज हरियाली छाएको छ । निरन्तरको गिरावटपछि साताको दोस्रो दिन बजार फर्किएको हो ।

गएको माघ १९ मा १३८९ अंकबाट शेयर बजार घट्न थालेको थियो । १३७ अंकको गिरावटपछि सोमबार नेप्से २६.४८ अंकले उक्लदै १२७८.९८ अंकमा बन्द भएको छ ।

क बर्गका कम्पनीहरुको कारोबार मापन गर्ने सेन्सेटिभ इन्डेक्स पनि माथि उक्लिएको छ । ५.९७ अंकको वृद्धि संगै सेन्सेटिभ इन्डेक्स २७७.४७ अंकमा पुगेको छ ।

कारोबार रकम पनि अघिल्लो दिनको तुलनामा थोरै बढेको छ । सोमबार १३ लाख कित्ता शेयर ५० करोड रुपैयाँ भन्दा बढीमा खरिद बिक्री भएको छ । सोमबार पनि कारोबारमा उतार चढाव देखियो ।

कारोबारको सुरुवाती तीन घण्टा लगातार बजार घटेको थियो । १२५१ अंकबाट सुरु भएको बजार तेस्रो घन्टामा १२१८ अङ्कसम्म झरेको थियो ।कारोबारको अन्तिम एक घन्टामा बजार बाउन्सब्याकु भएर २६.४८ अङ्क उक्लिएर बन्द भएको छ ।

सोमबारको कारोबारमा उपसूचकहरु मिस्रित देखिएका छन् । बैंकिंग, बीमा र जलविद्युतले बजार बढ्न मदत पुर्याएका छन् । सबैभन्दा बढी बीमा समूहमा १९२.८९ अङ्क, बैंक ३०.२३, जलविद्युत ३३.५९ र अन्य समूह १५.३३ अंकले बढेको छ । होटेल ,फाइनान्स र उत्पादनमुलक समूहमा गिरावट देखिएको छ । होटेल १४.४३ , फाइनान्स ४.४३ र उत्पादनमुलक समूह २.७९ अंकले घटेको छ ।

आज सबैभन्दा बढी नेपाल बंगलादेश बैंकको शेयर खरिद बिक्री भयो । बैंकको तीन करोड ४६ लाख रुपैयाँको कारोबार भएको थियो । आज चार कम्पनीका शेयरधनीले करिब १० प्रतिशत कमाएका छन् ।

स्वावलम्बन बिकास बैंक ,सिद्धार्थ इन्स्योरेन्स, युनाइटेड इन्स्योरेन्स र प्रुडेन्सियल इन्स्योरेन्स कम्पनीका शेयरधनीले करिब १० प्रतिशत कमाएका हुन् । आज सबैभन्दा बढी सगरमाथा इन्स्योरेन्स कम्पनीका शेयरधनीले करिब १० प्रतिशत गुमाएका छन् ।