• अर्थ सरोकार सम्बाददाता 

धनगढी । अर्थ सरोकार सुदूरपश्चिम ब्युरो संयोजक तथा रेडियो धनगढीका समाचार संयोजक पत्रकार सुदर्शन श्रेष्ठमाथि समाचार संकलनका क्रममा अपशब्द प्रयोग गरी दुर्व्यवहार गर्ने  मालपोत कार्यालय प्रमुख सुरेन्द्र केसीले अन्तत: पत्रकारसँग हात जोडेर माफी मागेका छन् । पत्रकार सुदर्शन श्रेष्ठले किटानी जाहेरीको तयारी गरेपछि जिल्ला प्रहरी कार्यालय कैलालीमा आएका केसीले आफुबाट ठुलो गल्ती भएको र आइन्दा यस्तो गल्ती नगर्ने भन्दै सबैसामु माफी मागेका हुन् । जिप्रका कैलालीमा पत्रकार संगठनका प्रतिनिधिहरु, अर्थ सरोकारका प्रतिनिधि, रेडियो धनगढीका प्रतिनिधि र केसीकै केहि आफन्तहरु पनि थिए ।  

‘आवेगमा आएँ । छोरोजस्तो मान्छेलाई दुर्व्यवहार गरें । सार्है लज्जित भएको छु ।’ सबैका सामु पत्रकार श्रेष्ठसँग माफी माग्दै उनले भने, ‘तिमी छोरो जस्तो मान्छे, बाबुसम्झेर माफ गरिदेउ । मबाट गल्ती भयो ।’ साथै उनले अव आइन्दा कुनै पनि पत्रकारलाई उतिकै सम्मान गर्ने प्रतिबद्धतासमेत जनाएका छन् । सो प्रकरणमा केसीको गल्ती भएको भन्दै उनका आफन्तले पनि यो प्रकरणका कारण केसीको धेरै बेइज्जत भइसकेकाले यसलाई नलम्ब्याउन र केसीलाई माफी मगाउन लगाएका थिए । ‘उहाँ अलि अस्वस्थ पनि हुनुहुन्थ्यो । अन्य तनावमा पनि हुनुहुन्थ्यो । पछिल्लो केहि समय बढी रिसाउने गर्नुभएको थियो । अन्जानमा गल्ती भयो । उहाँले माफी मागीसक्नु भयो । किटानी जाहेरी दिएपछि उहाँलाई पक्राउ गर्नुपर्ने हुन्छ । परिवार सार्है तनावमा छ । अव यस्तो नहुने / नगर्ने सर्तमा उहाँलाई माफी दिनुपर्यो ।’ उनका एक आफन्तले यस्तो अनुरोध गरेपछि माहोल केहि शान्त भएको थियो ।