काठमाडौँ – अहिले चन्द्रागिरीमा केबलकार चलेको चर्चा निकै छ ।  तपाई पनि आफ्ना बालबच्चा लिएर वा मन्दिरको दर्शन गर्ने भन्दै बुढाबुढी लिएर भर्खरै खुलेका चन्द्रागिरी केलकार चढ्ने तयारी त गर्दैहुनुहुन्न ? यदी हुनुहुन्छ भने एक पटक विचार गर्नुहोस् । शुक्रवार मध्यान्ह ४० मिनेट बन्द भएसँगै चन्द्रागिरी केवलकारका बारेमा हल्लीखल्ली मच्चिएको छ ।

शुक्रबार यस्तो भयो 

केवलकार चलिरहेको थियो तर बीच डाँडामा पुगेपछि करीब ४० मिनेटसम्म बन्द भयो । त्यसमा चढेका सर्वसाधरण तथा बालबालिका आत्तिए, रोए कराए तर विकल्प केहि थिएन । पहिलापहिला पनि ५-१० मिनेट केवलकार रोकिएको थियो तर शुक्रबार त अचम्मै भयो । ‘अव म त कहिले पनि आउँदीन’ एक यात्रुले अर्थ सरोकार डटकमसँग कुराकानी गर्दै भने । यो घटनापछि कतिपय त केवलकार नचढी नै फर्किएका थिए । ‘ज्यानभन्दा ठुलो कुरा केहि छैन । यो दर्ता नै नभएको केवलकारको कसले जिम्मा लिन्छ र ?’ अर्का एक यात्रुले अर्थ सरोकार डटकमसँग गुनासो पोखे ।   

  

पैसा समेत फिर्ता गरियो :

केवलकारमा यात्रा गर्दागर्दै केवलकार बीचमै ४० मिनेट रोकिए पछाडि टिकट काटेका केहि यात्रुहरुले व्यवस्थापनसँग पैसा फिर्ता मागेका थिए । सुरुमा केहि किचकिच गरेपनि यात्रुहरुले चरम दवाव दिएपछि उनीहरुको पैसा समेत फिर्ता गरिएको थियो ।  

यद्यपी उक्त केवलकार संचालन गर्ने कम्पनीका प्रतिनिधिले भने केबलकार ब्याट्रीको समस्याका कारण १० मिनेट मात्र रोकिएको दावी गरेका छन् । चन्द्रागिरी केवलकार चन्द्रागिरी नगरपालिकामा विना दर्ता सञ्चालन भइरहेको नगरपालिका स्रोतको दावी छ ।