">
काठमाडौँ – स्वास्थ्य मन्त्री गगन थापाले स्वास्थ्य मन्त्रालय सम्हाले लगत्तै वैदेशिक रोजगारीसँग जोडिएकको निकै महत्वपूर्ण काम अघि बढाउने निर्णय गरेका छन् । शुक्रबार राष्ट्रपति भवनमा सपथ खाएलगत्तै स्वास्थ्य मन्त्रालय पुगेका थापाले बैदेशिक रोजगारीमा जाने युवाहरुको स्वास्थ्य परीक्षण सम्बन्धी फाइलमा हस्ताक्षर गरेर सो काम अघि बढाउने निर्णय गराउने निर्णय गरेका हुन् ।
वैदेशिक रोजगारीमा जाने क्रममा युवाहरुमा स्वास्थ्य परीक्षणलाई लिएर समस्या हुने गरेको विषयमा मन्त्रालयमा बेला–बेलामा उजुरी समेत पर्ने गरेपछि मन्त्रालयले समिति गठन गरि छानबिनको प्रक्रिया अघि बढाउने निर्णय गरेको थियो ।
समितिमा स्वास्थ्य मन्त्रालयका प्रथम श्रेणीका चिकित्सक, नेपाल मडिकल काउन्सिलका एक चिकित्सक, श्रम तथा कानुन मन्त्रालयका एक अधिकृत, नेपाल स्वास्थ्य व्यवसायी महासंघका प्रतिनिधि तथा वैदेशिक रोजगारीबाट फर्किएका एक व्यक्ति सदस्य रहनेछन् ।
नेपालबाट बैदेशिक रोजागरीमा जाने युवाहरु बेला–बेलामा विदेशमा पुगेर स्वास्थ्य समस्यामा फस्ने गरेका छन् । यो समितिले सो सम्बन्धमा गम्भीर अनुसन्धान गरी निर्णय गर्ने तयारी गरिरहेको बताइएको छ । स्वास्थ्यमन्त्री गगन थापाको नेतृत्वमा यो काम सम्पन्न भए, वैदेशिक रोजगारीमा जाने युवाहरुबीच देखिने यो ठूलो समस्या हल भएको मानिने बताइन्छ ।
