">
काठमाडौं – पूर्वप्रधानमन्त्री तथा राप्रपा नेता लोकेन्द्रबहादुर चन्दले बारम्वार भेट्न खोज्दा पनि पूर्वराजा ज्ञानेन्द्र शाहले भेट नदिएको बताएका छन् । ‘मैले भेट्न खोजेको एक बर्षदेखि हो तर उताबाट भेटको समय नै निर्धारण गरिदैन’ चन्दले भने ।
चन्द दरवारकै आडमा तीन पटक प्रधानमन्त्री भइसकेका छन् । पञ्चायतकाल देखि निरन्तर राजनीतिमा सक्रिय चन्दले पछिल्लो समय पूर्वराजालाई भेट्ने मौका नपाएको गुनासो सुनाए । २०४७ सालदेखि उनी राष्टिय प्रजातन्त्र पार्टीमै छन् । सुरुमा राष्टिय प्रजातन्त्र पार्टी चन्द समुह गठन गरेका उनले पछि सुर्यबहादुर थापासँग एकीकरण गरेका थिए । यी दुवै राप्रपाको मुल सिद्धान्त संबैधानिक राजतन्त्र नै थियो ।
दरवारका अति विश्वास पात्र मानिने थापा र चन्दले गणतन्त्र पछि गणतन्त्रबादी भए । संबैधानिक राजतन्त्रको आफ्नो मौलिक सिद्धान्तलाई छोडेर उनीहरु कम्यूनिष्ट पार्टीको एजेण्डामा आए । हिन्दुराष्ट्रका ठाउँमा धर्मनिरपेक्षता, संबैधानिक राजतन्त्रको सट्टा गणतन्त्र आफ्नो सिद्धान्त बनाए । त्यही देखि पूर्वराजासँग थापा र चन्दको सम्बन्ध चिसिएको राप्रपा नेता केशरबहादुर बिष्टले बताए ।
संविधानसभाबाट संविधान जारी हुनु पूर्वदेखि चन्दले पूर्वराजा ज्ञानेन्द्रलाई भेट्न खोजेका थिए । तर चन्दले आग्रहलाई पूर्वराजाले बेवास्था गर्दै आएका छन् । चन्द भन्दा बढि विश्वास पात्र राप्रपा नेपालका अध्यक्ष कमल थापा बनेका छन् । तर कमल थापासँग पनि त्यति सारो सम्बन्ध पूर्वराजासँग कायम रहन नसकेको बिष्टले बताए ।
राप्रपा र राप्रपा नेपालबीचको एकीकरण भाँडिएपछि उनले फेरी पूर्वराजालाई भेट्न खोजेका थिए । ‘देश बाहिर जानु पर्ने भएकोले भेट तत्काल सम्भव छैन, भन्ने जवाफ आयो’ चन्दले भने । जतिपटक चन्दले भेट्न खोज्छन् त्यति नै पटक तत्काल सम्भव नभएको जवाफ पूर्वराजाबाट आउने गरेको छ ।
चन्दले पार्टी एकता भाँडिनुमा मुख्य जिम्मेवार राप्रपा अध्यक्ष पशुपति शम्शेर राणा भएको बताए । ‘म अध्यक्ष हुँदासम्म पार्टी एकताको छलफल अन्तिम चरणमा पुगिसकेको थियो, तरपछि ढंग पुगेन छ’ उनले भने ‘विदेश शक्तिले पार्टी एकता हुन नदिएको भन्ने कमल थापाको भनाई भने सत्य नभएको बताए ।’
- एस काठमाडौँ
