काठमाडौं – करिब डेढ दशक पछि अथवा २०५८ जेठ १९ भएको  ऐतिहासिक दरबार हत्या काण्डको विषयमा पुनः छानबिन गर्नुपर्ने भन्दै  मन्त्रीपरिषद्मा नै चर्को रुपमा आवाज उठेको छ ।

पूर्वराजा ज्ञानेन्द्र शाहले अहिलेको राजनीतिक परिस्थतिबारे बुधबार विज्ञप्ति मार्फत दिएको सार्वजनिक अभिव्यक्तिको सन्दर्भको विषयमा  बिहिबार मन्त्रीपरिषद्मा बैठक प्रवेश पाउनासाथ मन्त्रीहरुले दरबार हत्याकाण्डको  बारेमा अझै भ्रम मात्र फैलिएको  र हत्या भएको डेढ दशक बितिसक्दा पनि सत्य तथ्य सार्वजनिक नभएकाले पुनः छानबिन गर्नुपर्ने भन्दै लामो छलफल गरेको सहभागी मन्त्रीहरुले बताएका छन् ।

पूर्वराजाको अभिव्यक्ति संघीय गणतन्त्रविरुद्ध गम्भीर षड्यन्त्र हुनसक्ने औंल्याउँदै उनीहरुले यसलाई प्रतिगमनले टाउको उठाउन लागेको रुपमा लिँदै पूर्वराजाका गतिविधिमा गम्भीर निगरानी गरिनुपर्ने धारणा समेत राखेका छन् ।

उक्त विषयमा मन्त्रीपरिषद्ले तत्काल कुनै निर्णय नगरेपनि पूर्वराजाको विज्ञप्ति गम्भीर भएकाले सचेत हुनुपर्ने निष्कर्ष निकालेको बैठकमा सहभागी एक मन्त्रीले जानकारी दिए ।

घटनाबारे तत्कालिन प्रधानन्यायाधीसको अध्यक्षतामा गठित सत्यतथ्य छानविन आयोगले तत्कालिन युवराज दिपेन्द्रले आवेगमा गोली चलाएर हत्याकाण्ड मच्चाएको र अन्त्यमा आफैंलाई गोली हानेको प्रतिवेदन दिएको थियो । आयोग प्रतिवेदनमा आम जनता भने विश्वस्त छैनन् ।