काठमाडौं । नेपाली कांग्रेस सभापति शेरबहादुर देउवा र एमाले अध्यक्ष केपी ओलीबीच फेरी भनाभन भएको छ ।

शुक्रबार कांग्रेस नेता कृष्णप्रसाद भट्टराईको ९३ औं जन्मजयन्तीको बाँडेगाउमा आयोजित कार्यक्रमा उनीहरुबीच जुहारी चल्न पुग्यो । अतिथिका रुपमा उपस्थित दुवैजनाले मन्तव्य राख्ने क्रममा एक अर्कालाई आक्षेप लगाए ।

सभापति देउवाले ०७४ माघसम्म तीन तहको निर्वाचन गर्नुपर्ने बताए । अध्यक्ष ओलीले मन्तव्य सकाएपछि उपस्थित भएका देउवाले मन्तव्य राख्दै ओलीलाई संसदमा अवरोध गर्ने कामलाई पन्छाउन आग्रह गरेका थिए । उनले कार्यक्रममा ढिलो आएको बताउँदै आफूलाई माफी दिन ओलीसँग अनुमति मागे । ‘ओलीजी ! तपाईले संशोधन विधेयक संसदमा पुर्याउन दिनुभएको छैंन,जसरीभएपनि मधेसी जनताको भावना बुझेर सहमतिमा आउनुस । यसरी रिसाएर त निर्वाचन त हुँदैन नि’देउवाले ओलीलाई नरम शैलीमा आफनो कुरा सुनाए ।

यसअघि अध्यक्ष ओलीले आफूहरु निर्वाचनको बाधक भएको तर्क प्रस्तुत गरेका थिए । प्रधानमन्त्री प्रचण्डलाई ‘आइकन’को संज्ञा दिँदै ओलीले देश र जनताको हितमा संविधान संशोधन गरेको भए किन हामी त्यसको विरोध गथ्र्यौ ? उनले प्रश्न गरे । ‘संशोधन प्रस्ताव पारित भए कुन धाराले निर्वाचनलाई सहयोग गर्छ र पास नगर्दा कुन धाराले अप्ठ्यारो पार्छ ? ओलीले भने–‘सीमांकन परिवर्तन सम्बन्धित क्षेत्रमा नभई महोत्तरी र सिराहातिर उठेको छ । ५ नम्बर प्रदेश टुक्राउने यो क्षेत्रमा होइन । के पहाड र तराई अलग गर्न खोजेको हो ?’