चितवन । नेपाल चार्टड एकाउन्टेन्ट्स संघ (एक्यान) चितवन च्याप्टरले भरतपुरमा आयोजना गरेको सामाजिक सुरक्षा कोष सम्बन्धि प्रशिक्षण कार्यक्रममा उल्लेखनीय सहभागिता देखिएको छ । असोज ४ गते भएको उक्त कार्यक्रममा सयौंको संख्यामा सहभागीहरुले सहभागीता जनाएका थिए भने उक्त कार्यक्रममा सामाजिक सुरक्षा कोषसम्बन्धि निकै महत्वपूर्ण बहस भएको थियो ।
कार्यक्रममा उपस्थित प्रमुख अथिति भरतपुर नगरपालिकाकी मेयर रेणु दाहालले राष्ट्र निर्माणमा सिएहरुको भूमिका महत्वपूर्ण हुने बताउँदै सम्पूर्ण नगरपालिका चार्टड एकाउन्टेन्टहरुको सहयोग लिएर सहकार्य गरी अगाडि बढ्न तयार भएको बताएकी छिन् । सामाजिक सुरक्षा कोषलाई लिएर चितवनमा तालिम आयोजना गरेकोमा आयोजकलाई धन्यवाद दिंदै उनले समग्र व्यवसाय वा सिए क्षेत्रमा आफुले गर्नुपर्ने योगदानमा कुनै पनि कमी नहुने दावीसमेत गरेकि छिन् ।
उक्त कार्यक्रममा विभिन्न व्यावसायिक क्षेत्रमा अग्रजहरु, एक्यानका प्रतिनिधिहरु, संचारकर्मी लगायतको उपस्थिति थियो । भव्य रुपमा सम्पन्न भएको उक्त कार्यक्रममा सयौंको संख्यामा सहभागीहरुको सहभागिता थियो । साथै नेपाल चार्टड एकाउन्टेन्ट्स संघ (एक्यान)-चितवन च्याप्टरले सोहि दिन आफ्नो कार्यलयसमेत उद्घाटन गरेको छ ।
