- अर्थ सरोकार सम्बाददाता
काठमाडौं । पूर्वस्वास्थ्य राज्यमन्त्री डा. सुरेन्द्र यादव अपहरण प्रकरणमा उजुरी दिन जनता समाजवादी पार्टी, नेपाल (जसपा)का नेताहरु काठमाडौंस्थित जिल्ला सरकारी वकिलको कार्यालय पुगेका छन् ।
सत्तारुढ नेपाल कम्युनिस्ट पार्टी (नेकपा)का सांसदद्वय महेश बस्नेत र कृष्णकुमार श्रेष्ठ तथा नेपाल प्रहरीका पूर्वमहानिरीक्षक सर्वेन्द्र खनालले आफ्ना सांसद सुरेन्द्र यादवको अपहरण गरेको भन्दै त्यसविरुद्ध जाहेरी दर्ता गर्न उनीहरु बबरमहलस्थित कार्यालय पुगेका हुन् । पूर्वराज्यमन्त्री डा. सुरेन्द्र यादवसँगै उजुरी दिन बबरमहल पुग्नेमा पार्टी नेता उपेन्द्र यादव, राजेन्द्र महतो, राजेन्द्र श्रेष्ठलगायतका नेता छन् ।
यसअघि नेताहरु काठमाडौं प्रहरी परिसर पुगेपनि प्रहरीले सो उजुरी दर्ता गर्न अस्वीकार गरेको थियो ।समाजवादी पार्टी फुटाउने उद्देश्यका लागि बैशाखमा १० मा काठमाडौंबाट पूर्व आईजीपी खनाल, श्रेष्ठ र बस्नेत महोत्तरी पुगेर सांसद यादवलाई काठमाडौं ल्याएका थिए । प्रधानमन्त्रीकै निर्देशनमा सांसद यादवको अपहरण गरिएको आरोप जसपाका नेताहरुले लगाउँदै आएका छन् ।
